لو حد فى يوم بقلم الشاعر /عبدالله الخطيب

لوحد فى يوم

خبط على قلبك

قوم ياللا افتحله

يمكن كان عايز 

يومها تقوله

انى بحبك

تبدره من جوه 

جناين قلبك

يطرحلك فل

يتونس بيك

تتونس بيه

ويكون قمراية

تنور ليه

وتنور ليه

وينور فيك العتمة 

الساكنه من جواك

واعاك تظلمه

او تقفل مره ف وشه

الباب

وعهد الله بقلم الشاعر/محمود فؤاد

قصيدة / وعهد الله

...........

شعر/ محمود فؤاد

...........

- وعهد الله..

- مانيش بايع ولا شاري.

- وكنت في قلبي متداري.

- وكنت حنيني وحناني.

- لكني عرفت من تاني.

- طريق الآه.

- وعهد الله أنا كنتك..

- وعمري يا قلبي ما خنتك.

- حاولت كتير أرسيك على جرحي.

- لكن فيك  قساوة تهد ما تبني.

- وعهد الله..

- في يوم عديت على بابك.

- وقلبي يدق أعتابك.

- لا كان منك غير النشوة.

- بكسرة قلبي والشكوى.

- ومهما حاولت أراضيك.

- يزيد الشوك أراضيك.

- واقول لك بس إيه تاني.

- وعهد الله مانيش صابر.

- وأصبر ليه على الحرمان.

- وادوس قلبي واقول قادر.

- يعيش من غيرك الأحزان.

- وعهد الله خلاص هانت.

- وأخرتها أهيه بانت.

- لا كنت في يوم من الثائرين.

- أقول كنا وأقول كانت.

..........

شعر/ محمود فؤاد

الخميس ٢٠٢٣/٩/١٤

الروح تحترق بقلم الشاعر / حسن عبدالمنعم رفاعى

الروح تحترق

===============

يجافى النوم عيوني والروح تحترق.

يغزوني الضيق ويخذلنا الطريق.

أتمنى أرى الطرق بلا عائق0

فيجعل قلبي جحيما لا يطاق.

وضعت قلبي بين يديك فترفق.

نشعر بالألم والعذاب عند الفراق.

نور وجهك أبهى من الإشراق.

عند اللقاء تتولد حرارة الأشواق.

لتحكي عيناهما حديثا عند العناق.

همسات عتاب تخفف لهيب الاشتياق.

لا يفهمها إلا من اكتوى بنار العشق.

كذبوا عليك بانك بالقلب عاشقُ.

فهل أنتهي ما بيننا من عوائق.

يا ليتنا نظل أحباب ولا نفترق.

ونتمنى الموت على أن لا نفرق.

----------------------------

الشاعر الحزين/حسن عبدالمنعم رفاعي

حلقات مسلسلة بقلم الدكتور /مدحت مصطفى

الحلقة الخامسة.. 

المشهد الأول.. 

يوم الخميس.. نهاية الاسبوع في الورشة 

شحتة.. بقولك يا فوزي

فوزي.. نعم يا معلم 

شحتة.. خلي الرجاله تشطف وتغير وتعدي على الحسابات تقبض عشان تلحقوا تروحوا

فوزي.. تسلم يامعلم يلا يا رجالة الشرقية القواهريه هيحملوا التريلا

حلوان.. ايوه ياعم هتخلعوا بدري بدري

ربيع.. حلوان احنا طول الأسبوع بايتين في الورشة نحمل ونعتق وانت بتنام في بيتك باصص لينا في أم الساعه اللي ماشينها بدري عشان نلاقي مواصلات 

حلوان.. بنهرج ياعم هو انتوا مبتعرفوش تهرجوا

هشام.. لا يسطا حلوان ينهرج وعندنا استعداد نسخسخك من الضحك بس رد عمي ربيع صح جداً عشان تاني مره متشغلش نفسك إلا بنفسك وحاجه زي دي قولنا توصلوا بالسلامه 

حلوان.. الله الله الله أخيرا سمعت صوتك أنا مفكرك أخرس 

هشام.. هو انا فعلاً أخرس.. بس أخرس عن أي كلمة مش تعنيني أخرس عن أي كلام ملوش لازمه

حلوان.. توصلوا بالسلامة ياعم وترجعولنا السبت بألف مليون سلامه 

هشام... الله يسلمك يارب.. أخيرا هنزل اشوف أبويه وأمي وأخواتي يااااه انا حاسس إني بقالي سنه في الغربه اللهم لك الحمد والشكر يارب 

هشام.. بقولك ايه يا ابو داليا 

فوزي.. نعم يانسيب

هشام.. هو الاسطي شحته هيحاسبني علي كام متعرفش

فوزي.. ممكن 15جنيه عمرو زلموكا وسوسته اصغر منك وبيديهم 15وانت ماشاء الله عليك بتاع شغل وكل الصنايعيه مبسوطه منك 

هشام.. يارب يسمع منك ربنا كده بإذن الله هأفرح أبويه والإكراميه اللي معايا مواصلاتي رايح جاي وأفرح عمر أخويا وتغريد أختي يشتروا حاجه حلوه.. 

فوزي.. طيب انجز وفي لحظه الا لحظه الاقيك غيرت عشان الوقت مش يتأخر علينا محدش بيستني حد هنا

هشام.. حاضر.. لبس بسرعه وحط هدومه في كيس وحطهم في الشنطه ونزل على السلم فرحان موت 

طارق المحاسب.. هشام محمود 

هشام.. نعم 

طارق.. الظرف بتاعك أهه

هشام.. شكراً جزيلا لحضرتك حط مرتبه في جيبه 

فوزي.. إفتح الظرف شوف شحته حاسبك علي كام؟ 

هشام.. حاضر 

هشام.. والحزن والوجع تقل علي كتافه وبصوت حزين دا محاسبني علي ٧ جنيه

فوزي.. نعم؟  7جنيه ازاى

هشام.. آه والله العظيم الفلوس قدامك أهه 

فوزي.. ازاي الكلام ده يسطا شحته يسطا شحته 

شحته.. عايز ايه يا فلاح

فوزي.. هو انت محاسب هشام علي كام يسطا؟ 

شحته..،7جنيه 

فوزي.. ليه يسطا هو مش شغال دا كل الصنيعيه بهدلته شغل ومبيقولش لأ لحد مش على لسانه غير حاضر وبس

شحته.. الدنيا مريحه يافوزي شويه كده ونخليه 10جنيه

فوزي.. لأ كده حرام يقعد مع أبوه في الأرض احسن سلام عليكم يسطا 

هشام.. خلاص يا ابو داليا الحمدلله على كل حال نعمة وفضل من رب العالمين 

ركبوا العربية اللي هتنزلهم من الجبل علي الاستراد وركبوا موقف السلام ومن السلام ديرب نجم

هشام.. بيكلم نفسه وبعدين يا هشام هترجع؟  مش عارف والله بس دايما البدايه بتكون صعبة ويا تستحمل لحد ما يعرفوك وتثبت نفسك يا يبقي خلاص كده وكل شغلانه هيقابلك فيها عقبات ومعوقات هتيأس منها يبقي عمرك ما هتنجح هو يعني الصنيعي اللي بياخد100جنيه خدهم اول ما جه أكيد لأ طبعا.. 

فوزي.. عشوه حلوه بقي يا ابو النسب 

فوزي.. هشام يا هشام 

هشام.. نعم يالوز

فوزي.. روحت فين ياعم 

هشام.. معاك يا حبيبي 

فوزي.. متزعلش نفسك الجبل مليان ورش وشحته لو عنده ورشه فانت ليك الدنيا كلها 

هشام.. ونعم بالله بس انا لسه معرفش حاجه عن الصنعه فأي مكان هروحه مش هيقدرني صح فلازم أتعلم الأول 

فوزي.. يعني راجع معانا السبت 

هشام.. بإذن الله تعالى 

فوزي.. وربنا هيراضيها إكراميه من هنا شويه كسر مع تنضيف المكن يتتراضي يا حبيبي 

هشام.. ونعم بالله 

فوزي.. مش عايزك تزعل زعلك واجعني فين ضحتك الحلوه 

هشام... ههههههههههه موجوده بفضل الله 

فوزي.. عشوه في مطعم كل النااس وعلي حساب جوز اختك يا عم 

هشام.. الله يكرمك يا لوز معايا يا عم الحمد لله 

فوزي... معاك الخير كله بس انا عازمك 

هشام.. خليها وقت تانى تعزمني واعزمك انما النهارده بالذات انا هاحاسب لنفسي

فوزي... ياعم الحاج احنا أهل واخوات دا انا واخد منكوا 24ضلع

هشام.. علي راسي من فوق يا حبيبي بس وحياة أخوك سيبني علي راحتي نفسي احاسب علي لقمتي من عرقي والايام جايه بإذن الله وهنعزم بعض لما نشبع

فوزي.. دماغك صلبة 

هشام.. ههههههههههه نصيبي ههههههههههه الحمدلله 

المشهد الثالث.. مطعم كل النااس 

هشام... السلام عليكم ورحمة الله وبركاته 

نور... عليكم السلام ورحمة الله وبركاته 

هشام... ازيك يا عم نور

نور.. بخير يا استاذ 

هشام.. بعد أذن حضرتك عندك خضار أي؟ 

نور.. فاصوليا وبطاطس وبسله وملوخيه

هشام.. هي الفاصوليا مش عاوزه تعتقني لوجه الله انا قربت ازرع

طيب بص ياسيدي طبق رز بالشعريه وطبق بسله وطبق شوربه وبعد اذنك لمونه واذا تكرمت طبق صلطه طازج وقطعلي عليه قرنين شطه حار وصدر فرخه والمخلل خليه شطه حاره 

نور.. حاضر يا استاذ 

فوزي.. هاتلي كشري وصدر فرخه 

ربيع.. وانا كشري وصدر فرخه 

نور... علي عيني يا أفنديه

نور.. وعندك اتنين كشري و3صدور ورز بالشعريه وفاصوليا وروق عليهم

هشام... فاصولية مين الله يكرمك بقولك انا كلت فاصوليا لما زرعت.. بسله بسسسسسله يا عم نور 

نور... ههههههههههه حاضر يابيه نسيت والله 

المشهد الرابع... البيت.. 

هشام.. السلام عليكم ورحمة الله وبركاته ازيك يابا ووطي حب أيده 

ابوه... ازيك ياحبيبي عامل اية 

هشام... الحمدلله يابا وحشتوني هي فين أمي وخالد وعمر وتغريد

أبوه.. أمك جوه بتجهزلك عشا زى ما تكون جاي من الكويت ههههه

هشام.. انا اتعشيت الحمدلله 

هشام... ياما ياما 

أمه... قلب أمك.. حبيبي.. خدها بالحضن فضلت تبوس فيه ساعه

هشام.. وحشتوني قوى ياما

أمه.. وانت يانور عيني الدار من غيرك شينه موت

هشام.. ربنا يخليكي ليا ياما يارب أخواتي فين 

أمه.. تلاقيهم بيلعبوا في جرن عمك 

هشام... طيب متتعبيش نفسك انا اتعشيت في المطعم انا وابوداليا 

أمه.. ينفع كده زعلانه منك دا اني عملالك محشي علي الكانون وهاحمرلك البط بالسمنه البلدي

هشام.. تسلميلي يانور عيني يارب بس كنت واقع من الجوع فكلنا في ديرب شويه كده وهاكل احنا سهرانين انتو واحشني موت 

أمه.. وانت يا قلب أمك عمر اخوك وتغريد عيطوا عشانك من كتر ما أنت واحشهم

هشام.. طيب انا هروح اناديهم 

ابوه... رايح فين ياللا

هشام... هنادي اخواتي من جرن ابويا عبدالفتاح

هشام... توته يا توته

تغريد... هشششااااام يا عمر هشام ايجاااا

هشام.. حبييتي وحشتوووني قوووي وخد اخواته الاتنين في حضنه

هشام.. بقولك ايه؟ 

تغريد.. نعم ياحبيبي 

هشام.. خدي ال3جنيه دول معاكي اللي نفسك فيه ابقي اشتريه 

تغريد... ياقلب اختك اني مش عاوزه حاجه 

هشام.. هزعل منك دى اول فلوس خاصه بيا مش تكسفيني

عمر.. واني؟ 

هشام.. وانت يا حبيب قلبي من جوه 3جنيه اهم وكل اسبوع هاديك زيهم أدعيلي وملكش بركة إلا أبوك وأمك

عمر.. متقعد معانا يا هشام أبوك مطلع عيني شغل

هشام... احسن دوق شوية من المرمطه اللي انا شفتها ههههه

عمر... لا بس اني غيرك اني ببلطج عليهم ياعم 

هشام... ههههه طيب يلا يا عم البلطجي عشان نقعد مع أمك وابوك عشان انتوا الكل واحشني قوي 

هشام... ازيك يابا 

أبوه.. في نعمه يا حبيبي  طمني عليك أي اخبار الشغل وفوزي عامل معاك ايه 

هشام... بخير والله يابا وفوزي جدع وطيب وابن حلال والله 

أبوه.. طيب الحمدلله.. هترجع معاه ولا حرمت

هشام.. لأ هسافر بإذن الله... خد يابا

أبوه.. أي ده يا حبيبي 

هشام.. دا رزق ربنا لأبنك الحمدلله 

أبوه.. خليه معاك

هشام... هاعمل بيه ايه معايا موصلاتي الحمدلله وبعدين انت عمرك ما قصرت معانا في حاجه واني ابنك وخدامك يابا

أبوه.. اني اللي خدامكم يا حبايبي ربنا يعيني ويقويني أعلمك واعلم اخواتك

هشام... يارب يابا يبارك فيك ومش يحرمني منك أنت وأمي واخواتي

ابوه.. ولا يحرمني منكوا يارب.. تشرب شاي علي البصابيص

هشام... ماشي يابا تسلم ايدك 

هشام.. هو خالد اخويا فين 

أبوه.. بيدي درس في الطواحين يابني أدعيله ربنا يكرمه ويثبت أقدامه ويحبب فيه خلقه

هشام.. يارب يابا خالد اخويا أبن حلال وطيب وربنا هيسخر ليه ولاد الحلال والله يابا الاسطى عمرو لما عرف اني اخو خالد جابلي عصير وبيعاملني حلو قوي 

أبوه.. وعرفت تشتغل كده دول بيقولوا الشغلانه صعبه قوي 

هشام... يعني هو العزيق وقطع الزريبه اللي سهل ما ازفت من زفته الا ميت غمر اهو كله شغل

هشام... عايز انام علي رجلك ياما

أبوه.. ههههههههههه أكبر ياض يا ابن أمك 

هشام.. هترقيني يابا وتدعكلي جسمي اني جسمي كله بيغني يا عطارين دلوني ع الصبر فين اراضيه

خالد... وصل بالعجله.. السلام عليكم 

هشام... حبيبي وعليكم السلام حمدالله على السلامة 

خالد... حبيبي حمدالله علي سلامتك عامل ايه 

هشام.. تمام الحمدلله 

خالد.. شحته حاسبك على كام؟ 

هشام.. على 7جنيه بس اوعي تعرف ابوك وامك عشان مش يزعلوا 

خالد.. 7جنيه ازاى هو انت مش قولتله إنك اخويا 

هشام... قولتلوا والله وفوزي زعل وكلموا بس هو قالوا الشغل مريح

خالد.. يبقي هو بيطفشك اقعد معنتش تروح 

هشام.. لا ياحبيبي هروح بإذن الله تعالي ومع الوقت هيزودني وانا عايز اتعلم الصنعه ومحدش بيطلع الجبل مره واحده ادعيلي بس 

خالد.. يا حبيبي ربنا يعينك بس الشغلانه اعدام حرام عليه 7جنيه أي دي 

هشام... قول يارب وأنا لما اتعلم اكيد هاطلب اللي نفسي فيه انما دلوقتي انا حته عامل لا راح ولا جه والحمد لله ربك بيراضي

خالد... ماشي علي بركة الله ربنا معاك متجيبي العشا ياما

أمه... حاضر يا حبايبي انا مجهزه ومحمرة البط ومستنياكوا وبالمره اخوك يكون جاع شويه عشان ياكل معانا. 

هشام... أنا هتعشي واطلع اسهر مع صحابي شويه 

أمه...  صحابك مين ياضنايا وانت تعبان وجاي من سفر نام وارتاح

هشام... وحشوني والله ومش هاطول 

أبوه.. هتسهر مع مين؟ 

هشام.. متقلقش يابا انت عارف اني مليش غير الشباب اللي بتوع مصالح وفي حالهم. 

ابوه... ماشي علي الله اشوفك مع عويل ملوش لازمة

هشام... حاضر يابا متقلقش

إنتهت الحلقة 5

رسالة حب بقلم الشاعر/رضا ابو شنب

(رسالة حب) 

رسالة حب بهديها

لمن في القلب عنوانها

وشوقي ينكتب فيها

واعيش العمر خدامها

وانام واحلم انا بيها

وافكر نفسي بكلامها

ولما ببص في عنيها

بشوف الدنيا وجمالها

واحط ايديا في ايديها

واقرب حبة من خالها

بنفسي وروحي بفديها

واسيب الكل علشانها

رسالة حب بهديها

لمن في القلب عنوانها

********************

رسالة حب وحروفها

بترقص جوا في ودانها

ولما حروفي بتشوفها

بتزرع  ورد قدامها

وزي الورد بقطفها

واهز بأيدي خلخالها

وتحضن فيا من خوفها

واشم العطر من شالها

وكلمة حب بسمعها

وتشكي بكل  احوالها

ولما بحس بدموعها

على خدي بقول مالها

وتحرق فيا انفاسها

وترجع تمشي بدلالها

رسالة حب بكتبها

لمن في القلب عنوانها

**********************

رسالة حب بكتبها

واجيب الحبر من عيني

و مهما اكتبها واشطبها

هقول فيها  وحشتيني

واقولك نفسي اسمعها

وخايف مرة تنسيني

انا جوايا  نار والعة

ودمع عنيكي يطفيني

بايدك تمسحي  الدمعه

وممكن برضه ترميني

رسالة حب بكتبها

واجيب الحبر من عيني

ومهما اكتبها واشطبها

هقول فيها وحشتيني

هقول فيها وحشتيني

*********************

بردان القلب بقلم الشاعر/أيمن أسماعيل

بردان القلب 

ويدفا من نظرة عين

والصوره المعكوسه فى عينى

مليانه حنين

وانا وانت 

برغم البعد بنتقابل

نسمع ثومه وحليم

وبنرسم فى حدود احلامنا

ونمد أيدينا نجيب النجمه

وانت القمر

الداير فى مدارى

قلبك دارى

وقلبى بيتلهف

على كلمه

تسمعها ودانى

أو يمكن تطلع تنهيده

ولأمتى تدارى

مقسوم انا وانت نتلاقى

والقسمه إن كانت تجمعنا

مقسومه ارواحنا على واحد

ولا يمكن راح نبقى اتنين

حلقات مسلسلة بقلم الدكتور /مدحت مصطفى

المشهد الأول.. 

هشام... سرح بعيونه ناحيه الزرع وكله أمل وطموح وقال بقلب عشمان في كرم ربه يارب اكرمني واتعلم ومفيش مخلوق يشمت فيا

المشهد الثاتي.. 

وصلنا الورشه في شق التعبان في طره البلد 

الرجاله.. سلام عليكم 

الاسطي شحته.. وعليكم السلام 

فوزي... دا هشام أخو الاستاذ خالد أبن اختك اللي كان هنا محاسب 

شحته.. مرحب ازيك ياد يا أبن شكريه

هشام.. الحمد لله ياخال بس شكريه ده بيني وبينك ولما تزورنا فى البيت بنت خالتك وصلة رحمك انما قدام الرجاله فى الورشه الاسطي هشام 

شحته... اووسطااا مره واحده 

هشام.. آه يا خال اوسطا هنا مش بيقولك لوسطااااا شحته وانت من الشرقية بردو امي حكتلي البهدله اللي أنت شفتها وأصرارك تنجح وانت دلوقتي ربي يزيدك الاوسطي شحته

شحته.. انت في سنه كام في العلام

هشام.. خلصت 3اعدادي والحمد لله من الاوائل ودخلت ثانوية عامة فصول المتفوقين بفضل الله 

شحته.. طب اطلع غير وانزل الشغل وبراحه لتعور نفسك 

هشام.. حاضر يسطا 

فوزي.. هو شحته ده من البلد

هشام.. اه من البلد 

فوزي.. أنت ايه اللي عرفك؟ 

هشام.. أمي بتفضل تحكيلي علي الناس اللي شقيت وأجتهدت وعملت اللي عليها فربنا جزاهم خير ووفقهم

فوزي.. طيب احنا هنلاقيلك كوزلك علي مقاس رجلك منين 

هشام.. أي حاجة وهأحط قماشه في بوز الكوزلك

فوزي.. قماشه إيه دا انت هتستحمي سحاله

هشام.. يعني ايه سحاله

فوزي.. الميه اللي بتنزل من المنشار ومعاها الرايش بتاع القطع

هشام.. بيقلع وبيغير وبيقول في سره يارب وفقني ونور مخي وسخرلي الطيبين من عبادك يقفوا جنبي ويقضوا حاجتي

المشهد الثالث... 

نزل هشام علي السلم بتاع الورشة عمال يطلع علي المصانع اللي ماليه بعد النظر بسم الله ماشاء الله ربي يزيد من خير المصريين ويعمر بلادنا كلها مصانع ونخف الحمل عشان نطور بدل ما الناس مقهوره في ساقيه الشقى والحوجه والمذله والمهانه

المشهد الرابع.. 

هشام.. أبو داليا فين الاسطي عمرو السني اللي خالد اخويا قالي عليه 

فوزي.. أهه يسطا عمرو

عمرو.. صباح الخير يا لوز حمدالله علي السلامة 

فوزي.. الله يسلمك يارب ده هشام اخو الاستاذ خالد المحاسب القديم

عمرو.. حبيب قلبي ازيك يا هشام 

هشام.. ربنا يبارك فيك يسطا يارب 

عمرو.. الاستاذ خالد عامل اية 

هشام... بخير الحمدلله ربنا كرمه وأسمه نزل في الجريده واتعين وبعد شويه حزفوا أسمه من المسابقة وحطوا إسم وحده باين دافعه فلوس ولا بنت لوا المهم ربنا سخرلنا واحد مجوز بنت خالتي وعرف بالموضوع فقدم شكوى للوزارة بصورة الجريده واسم اخويا فيها فرجعوا ليه التعيين الحمدلله 

عمرو.. اخوك الصراحه قمه في الأدب والرجوله والشهامه

هشام.. ربنا يبارك في عمرك يسطا يارب واكيد حضرتك ابن ناس عشان كده اخويا من بين كل الصنايعيه بعتني ليك

الاسطى شحته... خاد ياض

هشام نعم يسطا 

شحته.. اطلع زق وراهم وهما بيعتقوا بس اوعي حد يخليك تنزل دلوقتي 

هشام.. حاضر يسطا 

هشام.. سلام عليكم 

وجيه عجا.. سلام ورحمه الله 

وجيه.. شرقاوي

هشام.. اه

وجيه.. اجدع ناس 

هشام.. ربنا يخليك يارب 

وانت منين 

وجيه.. من البساتين 

هشام.. اجدع ناس 

وجيه.. تسلم بس انت مش شبهم

هشام.. شبهم ازاى

وجيه.. باين عليك طيب كده

هشام.. ليه هما مش طيبين

وجيه... طيبين بس كلامهم تقيل كده تحس انهم مش عايزين يسيبو الشرقية والفلاحه

هشام.. هما غلابه بردو يا هو انت اسمك ايه 

وجيه.. هههه وجيه

هشام.. عاشت الاسامي يارب 

وجيه.. تشكر

هشام.. كنت عايز اقولك انهم محتكوش بحد خارج حدود المحافظه فبيكون حريص في معاملاته لحد ما بيطمئن ليه لكننا جدعان جدا وولاد بلد وبنحب الود قسما بالله ولما تزورنا وتنورنا تاخد احلي واجب 

وجيه.. اه شين كاف عين

هشام.. يعني إيه 

وجيه.. يعني شرقاوي كريم عظيم

هشام.. الله يكرم اصلك الطيب يارب دا من طيب أصلك

بيخلص المشهد وهشام هلكان شيل نزل حمل حط دخل ارفع احفض هات التاكس ههههههههههه هات التاكس دي لوحديها حكايه تهلك من الضحك.. 

كان في واحد اسمه ربيع من بلدنا راح الورشه فقالولوا اطلع هات تاكس فطلع علي الشارع ههههههههههه وهما شايلين الطاوله ونفسهم انقطع من الشيل مستنيين ربيع والاخر نزلوا الطاوله وطلعوا لقيوا ربيع واقف علي الشارع.. خد يا ربيع بتعمل ايه هنا 

قالوا والله العظيم يسطا مفيش ولا تاكس عدى عليا كله مكروباظ كل واحد فيهم وقع علي الارض من كتر الضحك 

طبعاً اول يومين دول أو أول اسبوع في الشغلانه الحلوه دي هلااااااك سواء كنت كبير او صغير كفايه الجرانيت لما بياكل صوابعك وتجيب دم مع ميه السحاله يا خراشي علي النشر اللي هتشوفه هتغني يا عين ياليل من الوجع 

هشام... يا ابو داليا 

فوزي.. نعم 

هشام... اني عايز اروح ومش عنت جاي

فوزي.. ههههههههههه ههههههههههه امال فين هبقي صنايعي ههههههههههه 

هشام... يا عم الشغلانه صعبه موت اني مش عارف انام من الوجع 

فوزي... أول اسبوع كده مر علينا احنا الكل

هشام... اني عامل زي الانسان الالي اللي كان في فؤاد المهندس 

فوزي... هاجيبلك حنه وقرض وهاعنهم وتحني ايدك بيه النشر هيوقف وايدك هتخشن معلش لسه فرفور

هشام.. علي فكره ايدي انشف من ايدك وجدع اقف قصادي في العزيق

فوزي... لا ياعم انا فاشل في الفلاحه دا اني سقيت أرض الراجل مكان ارضكوا ههههههههههه 

هشام.. ههههههههههه بقولك ايه 

فوزي... خير 

هشام.. مفيش مطاعم هنا

فوزي.. مطاعم ايه نهار ابوك ابيض

هشام.. خير يا لوز هو اني شتمتك

فوزي.. احنا بقالنا تلت سنين هنا نطبخ رز وفاصليا رز وبطاطس 

هشام.. طيب ليه ياعم اللي انتوا بتعملوه في نفسيكم ده

فوزي... مهو يا هشام لو اتبعنا المطاعم هنروح من غير ولا مليم

هشام.. ليه يعني هي وجبه الكفته بكام ولا نص الفرخه بكام

فوزي... تجيلها ب6جنيه النص فرخه

هشام.. طيب مهو عسل أهه

فوزي.. يا عم هشام يوميتنا 25جنيه لما ناكل ب6جنيه 

هشام.. بص يا ابو داليا هو اولا مش مطالب كل يوم تاكل نص فرخه ولا كل يوم كفته بس علي الاقل يومين تلاته في الاسبوع تاكل لقمه كويسه انما انتوا قلبتوا بطني بطاطس وفاصوليا 

فوزي... بص انت بكلامك ده هتعملها أحزاب 

هشام.. أحزاب ليه يا عم دي لقمه

فوزي... في ناس هنا ميته علي الدنيا لو سمع كلامك ده ممكن يرجمك ههههههههههه 

هشام.. أعوز بالله ههههههههههه معقوله للدرجادي

فوزي... بيخاف يدخل الحمام ليجوع

هشام.. أعوز بالله ليه يا عم ربنا مش أمرنا نموت نفسنا من الجوع ولا نديق علي نفسنا ولا نديق علي عيالنا وبردو في المعقول من غير اسراف 

فوزي.. سيبها علي الله وكل خميس واحنا مروحين ندخل نتعشي عشوه حلوه في الشناوى أو كل الناس 

هشام.. ماشي يا صاحبي تعرف اني كنت يوم العيد نلم بعض عيال العزبه ونروح ديرب نقعد ونتقنعر بقي نحس اننا كبار ومعانا تمن الوجبه وواخدين مكانا زي الناس ههههههههههه شغل عيال 

فوزي.. تصدق بالله يا هشام 

هشام.. لا إله إلاّ الله 

فوزي... احنا اللي عيال ههههههههههه 

هشام ههههههههههه ههههههههههه 

هشام.. عارف يا لوز انا مش بحب اللقمه الحلوه كبر اولآ نعم ربنا كلها حلوه بس طالما انت في يسر من امرك إنك تكرم نفسك واهلك باللقمه الطيبه يبقي حرام عليك لو قصرت وبخلت حتي الأجير عارف عمك محمود حماك دايما لما يبقي عندنا انفار في الأرض يقول لأمي استحلفك بالله يا أم خالد بلاش اللقمه العويله أكرمي الأجير تقولوا من عيني يا حاج 

فوزي.. والله العظيم كلامك صح يا هشام وياريت النااس كلها تعمل كده 

هشام... ملكش دعوة بالناس أعمل أنت ولما هيقابلك حد ويشوف فعلك هيعمل زيك هو انت هتيجي يوم القيامه تاخد شله معاك وتقول لربك كل النااس ولا ياريت الكل.. أنت هتتحاسب لوحدك فانشغل أنت تغير وتبقي قدوه لغيرك في كل حاجه 

أنتهت الحلقه4

حلقات مسلسلة بقلم الدكتور /مدحت مصطفى

بقلم الدكتور/ مدحت مصطفي

الحلقة الثالثة

المشهد الأول.. 

هشام.. خالد متاخدني معاك الورشه في القاهرة بعد ما اخلص الإمتحانات 

خالد.. حاضر يا قلب اخوك انا هأخلي فوزي جوز أختك ياخدك معاه عشان انا جالي التعيين مدرس زي ما انت عارف 

هشام.. ربنا يخليك يا أخويا يارب ويكتبلك كل الخير وأشوفك في أعلي المناصب

خالد.. بس الشغل في الورشه تقيل عليك يا هشام انت لسه صغير ياحبيبي 

هشام.. إن شآء الله ربنا هيديني الصحه وبالمره أجيب مصاريفي وكتبي ولبسي وأساعد ابوك وأخفف الحمل عليه وانت وعمر معاه في الأرض 

خالد.. سيبها علي الله ولما تروح الورشة قول للأسطي عمرو السني إنك اخويه عشان يشغلك معاه علي المكنه ويعلمك بالراحة عشان متعورش نفسك هناك الإصابات كتيره 

هشام.. ماشي ياخويا 

المشهد الثاني.. 

أبوه... يا مرحب يا مرحب قوم ياواد استقبل أختك وجوز أختك

هشام.. هلا هلا ازيك ياقلب اخوكي

حسنيه... ازيك يا حبيبي عامل اية؟ 

هشام.. ميه ميه الحمدلله وانجحت وجبت 268 من 280

حسنيه.. الف ألف مليون مبروك وده حلو ولا شين

هشام.. ههههههههههه هقولك حلو ولا شين أصبري هلا والله بأبو داليا الغالي

فوزي... حبيبي يا هشام عامل اية؟ 

هشام.. بخير الحمدلله ياحبيبي اتأخرتوا ليه كده ياعم الحاج موتونا من الجوع 

فوزي.. أختك السبب ياسيدي لما علفت البطتين 

هشام.. هما البطتين بتوعكم دول مش ناويين يزيدوا يعني تقولي التلت بطاط مثلا تفرحني انكو جبتوا وزه هههه

فوزي.. ههههههههههه ماشي يا هشام 

هشام.. حبيب قلبي يا أبو داليا أعمل حسابك هاجي معاك الورشه من بكره

فوزي... تنور يا أبو النسب بس الشغل تقيل عليك أصبر لما عودك ينشف

هشام.. متقلقش يا صاحبي نسيبك سداد بإذن الله وانت بردو عينك مني خايف أسقي ارض الجيران زي حالاتك 

فوزي.. ههههههههههه أنت لسه فاكر 

هشام... هو انا انسالك حاجه 

فوزي.. بيني وبينك أنا استصغرت الأرض عشان انجز

هشام... والله استصغرتها تقوم تسقي للراجل وتسيب أرضنا شراقي هههه 

فوزي... عمك الحاج صاحب الأرض كل لما يشوفني يقولي فينك يا أبو داليا الغله بتسأل عليك 

هشام.. ليه حق هههه 

هشام... حسنيه 

حسنيه... نعم

هشام.. ايدك على ال100جنيه

حسنيه..  بتاعت إيه 

هشام...  والله.. هو انتي مش قولتي 100جنيه لو نجحت واخوكي طالع التامن علي المدرسه ودخلت ثانوية عامة فصول المتفوقين كمان

حسنيه.. ألف مليون مبروك ياقلب اختك بس كده علي عيني 

هشام.. تسلم عينك ياقلبي فاكرة لما اتحدتيني في الأبتدائيه

حسنيه.. هي دي تتنسي لما جيت قدام حماتي تقولي اعمل فيكي ايه 

هشام.. مش بتقوليلي يا ابو ملاحق ابقي تف علي قبري لو نجحت وانا لسه هستني قبرك ههههههههههه 

حسنيه.. حبيب ربنا يوفقك دايما يارب 

هشام... تسلميلي ياقلب اخوكي بقولك يابو داليا هتمشي الصبح الساعه كام 

فوزي... الفجر بإذن الله وهات بصل وطماطم ومكرونه ورز وفاصوليا وبطاطس عشان بنطبخ هناك 

هشام... قول لحماتك تجهز المطلوب 

فوزي.. هيه عارفه مهو الأستاذ خالد هو اللي واخدنا كلنا الورشه

هشام.. طيب فهمني بقي الدنيا هناك ماشيه ازاي أديني فكره كده يعني 

فوزي.. نزل وحمل

هشام.. يعني ايه نزل وحمل

فوزي.. يعني احنا عمال نزل العربيه دي حاضر.. حمل العربيه دي حاضر 

هشام... امال خالد بيقولي مكن والأسطي عمرو السني والمكنه بتاعته هو المكن ده بتاع ايه يعني 

فوزي.. ههههههههههه لا انسي المكن خالص احنا شيالين وبس المكن ده بتوع البساتين وحلوان والمقطم صنيعيه عليه انما الفلاحين عمال يحملوا وينزلوا وبس 

هشام.. يعني انا لو اتعلمت وبقيت صنيعي مش هاقف علي مكنه

فوزي.. تتعلم ايه يابني أنسى 

هشام.. يعني ايه انسي؟ 

فوزي.. بص يا هشام احنا بالنسبه للناس دي عتيله بس مش هيعلمونا حاجه 

هشام... مش بيعلموكوا حاجه عشان انتوا مش عايزين تتعلموا انما لو عايز تتعلم هتتعلم

فوزي.. بسخريه ههه ههه ابقي قابلني

هشام... فين؟ 

فوزي.. فين ايه؟ 

هشام.. اقابلك فين بص يا ابو داليا قول يارب اللي اتعلم المهنه وبقي صنيعي مش احسن مني ولا منك بني ادم زيه زيك كل اللي فيها هو عنده إصرار وعزيمه وطموح أنه يطور من حياته ودايما متطلع أنه كل يوم يمر عليه يكون في مكان افضل من اليوم اللي قابله. 

فوزي... وانت بقي ناوى تبقي صنيعي ههه ههه

هشام.. لأ 

فوزي.. أمال ايه 

هشام.. هبقي صنيعي بريمو بإذن الله 

فوزي.. طيب كل بط عشان هيوحشك هناك ههههههههههه 

هشام... ماشي ههههههههههه ناولني لمونه هاتي طبق شوربه قدام أبو داليا ياما

المشهد الثالث.. 

بداخل ميكروباص عبود

فوزي.. صباح الخير يا ربيع ازيك يا ابو عناني صباح الورد يا خيري

كلهم.. صباح الخير يا ابو داليا ابنك ده؟ 

فوزي.. ده هشام نسيبي

خيري.. ودا جايبه يعمل ايه ههه مفيش مراجيح هناك يسطا

هشام.. عارف والله يا عم خيري إن المراجيح في مولد الشيخ فضل

خيري.. دا انت لميض بقي وخبطه علي دماغه بإستهتار

هشام... ايدك تاكل بيها يا عم خيري مش تقل بيا قدام الرجاله إذا تكرمت أخلاقك

خيري.. معلش يسطا بنحب نهرج

هشام.. وانا كمان بحب بس اللي علموك التهريج نسيوا يقولولك ليس منا من لم يوقر كبيرنا ويرحم صغيرنا ومش معني اني صغير في السن أنك تقل مني قدام الناس

خيري.. حقك علي راسي يسطا 

هشام.. ولا يهمك يا عم خيري 

ربيع.. ازيك يا هشام 

هشام.. الحمدلله يا عم ربيع 

ربيع.. بس الشغلانه تقيله عليك يا هشام وهناك مفيش ياما ارحميني

هشام.. سيبها علي الله.. قول يارب 

ربيع... يارب بس أبعد عن المكن خليك في الارضيه بره عشان متتعورش

فوزي.. اسكت يا حاج ربيع دا المعلم عايز يبقي صنيعي

كلهم.. ههههههههههه ههههههههههه ههههههههههه صنيعي دا اللي هو احنا بقالنا سنتين تلاته مبقناش صنيعيه

هشام.. والله دي حاجه ترجعلك انت وهو وعيب عليكم لما تلت سنين ولسه عمال 

محمد.. طيب عايز تبقي صنيعي لمعه ولا قطعيه ولا تشطيب

هشام.. لسه معرفش يا عم محمد لما اشتغل واشوف وبعدين ربنا يسهل 

محمد.. أنت هتبقي صنيعي بإذن الله 

فوزي.. ههههههههههه صنيعي ازاي يا أبو سباعي أنت كمان أنت هتعوم علي عومه 

محمد.. والله العظيم ربنا يفديه هيبقي صنايعي وليه أسم كمان 

فوزي... أنت شكلك الوليه تقلت عليك في العشا ههههههههههه 

إنتهت الحلقه

بقلمى_ دكتور مدحت مصطفى

أعتذار بقلم الشاعرة /أيفون نور الدين

اعتذار

نعم اعتذر لك قلبي 

وضعتك في صحراء  سنيني

عاقبتك بجفاء ايام وليالي

واليوم تنتقم مني وتسلمني

الي قلب لست اهواه ولكنه يتملكني

اخذ كل شئ راحتك وهدوءك وسكينتي

يحاورك  ويتلاعب بمشاعر تخنقني

بوما يملاء ساعاتي وأيام يجافيني

اعتذر لك قلبي انا من ضحيت بك

لم أبالي بدقاتي ولم أشعر باهتزازك

حب جارف . اعصار ولا سبيل لخلاصك

فأجبني هل تريد الخلاص؟تلك اختياراتك

اعترف في يده حياتك ابتسامتك

ولست تملك شئ الا عطائك وحبك

مرهون  مجبور. متورط. في عشقك

لن تجني منه حتي حبه ليس لك

غريب امرك قلبي تهوي دائما تعذيبي

تتلذذ من الآمي. وغرامك يرهقني

تسكن دقاتك في حبه وتتوهج حروفي

معه تتراقص كلماتي وتشع ابتهاجي

وتعلن سعادتي وتخرج ارق المعاني

واذا جرح تبكي علي بكاء دقاتي

ترسم للحزن كهوف لبختبئ قلبي

حالك يؤلمني أيها القلب ويزيد خوفي

مستسلم الي قدرك ولاتريد إبعادي

صابر انت علي غرامك ولا أمل في إيقافي

لن تنول منه سوي ماأنت فيه هو مشاعري

صادقة هي وجارفة هي ولكنها ملكي

اما عن حبيبي  ملك لقلبي وحدي

بيني وبين أوراقي وكلماتي هو ملكي

 ولاتحاسبني ايها القلب اني اعيش بأوهامي

فقد تذكر انها قصة نسجت حياتي

رسمت خطوط العمر وآمال للآتي.... E. N

أسفة نسيت بقلم الشاعرة / عفاف احمد الترك

آسفه نسيت..

لزقت قلبي فـ رد  ع الشاشة 

بعتت صُحبة ورد ..وقرنفل

وسؤال بيهز فـ كتافي بـ صمت

وسطر منسوخ للجميع..

من جبر خاطر واختصار للوقت

وحساب بيقفل بابه في عينيّ

لكنه فاتح للأمل شبّاك

فيااارب ..

نفسي اموت وادخل الجنّة ..

وقالولي لأ..الجنة ليها شروط

وانتي وخيالك والشعر ..

كـ  موروستان..

والجنّة عُقلا ..

ما يجوزش،فيها جنان

يارب اعمل ايه ..

ما انا غصب عني نسيت؟

وفتحت فتحة فـ حيطة الحواديت

وقفلت عيني واغتصبت النوم

(الجِنس ) فكرة تروادني عن نفسي

و(العشق)قوت الغلابة واللي عاش محروم

سيبك من التفاصيل يا مبيّت النيّة 

انا قد اكبر جبل وقت امّا تتأزّم

تتهد اسواري من لفظ حنيّة 

ساعتها باضعف قوي 

واسيبني للمجازات

ولشهقة البدايات..

من يوم ما ابن الهوي..

نط في بلاكونتي..

سحب ستارة الخجل ..

واتعرّي جوايّا..

ساعة ما فاح وردي ..

في طينُه واحضانه..

وازاي نشيد الشوق..

بيمتطي الرغبة ..وبنتعزف سوولو

وكأن جسمي (حرم )

وانا بنت مش (كعبة)

بتفسّر الاشواط علي مذهب الفطرة 

فـ باسيب لجسمي الارض..

وتاخدني روحي واطير 

«حالة انسلاخ وقتي ..من زنزانات الكبت »

بنكهة التوهان ..

تشبه لحد ما مزيج من الفودكا مع عرق توت احمر 

مخلوط بطعم الدمع..في حنجرة روحي

يا كركبات الذات ..

ساعة ما بانتعني من بطن تخريفي

ساعة ما بامنعني علي عتبة التجربة

كل ال..(يجوز) ممنوع

وانا العنيدة قصاد ..صهللات  الخوف

باسكت كتير جدا ..وباذاكر المحذوف 

وعندي شرح قبيح..لاغاثة الملهوف..

وباعرف اتخيّل..

دخلت من غير إحم حلمك وشفت حاجات

ويومين في حضنك ابات..

انا و عَيَاك فـ نقار

وشفت عز الصبح الدنيا بتليّل

وباقارن المسافات..

وبافسّر الاشعار..

ولحدك انت بـ ألوص مالقيتش ولا تفسير 

وانا اللي باطلع سلالم روحي قاطعة النَفس

ويرن قلبي الجرس.. اسمع وما افتحشي

كان نفسى جدا  اكون ..

زي فوني التاتش

واعمل بروفة موت كل ما افصل شحن

وابعت رسالة لحد ..

واقول له اسفه نسيت

لزقت قلبي فـ رد ع الشاشة 

وبعتت صُحبة ورد وقرنفل

وسؤال بيهز في كتافي بـ صمممت

..

دلوقت عايزة القلب والورد وسؤالي

ومش هانسي تاني وقل لي

(هو انت عامل ايه؟؟؟؟).

............................................

عفاف التركي

# قصيدة ..موروستان.

حلقات مسلسلة بقلم الأديب /د. مدحت مصطفى

الحلقة الثانيه... 

أبوه... لالا أنا اتكلمت مع عمامك وقالوا فلحوا معاك في الأرض أبن الفلاح فلاح وابن اللوا لوا وكلامهم صح... 

هشام... ليه كده يابا بالله يابا مش هخليك تحس اني في العلام وهشتغل معاك زي ما تحب بس سبني أكمل

أبوه.. يابني والله نفسي أعلمكم بس انت شايف الحال ظروفنا علي قد الحال وبعدين اللي أتعلموا قبلك عملوا ايه 

المشهد الأول.. 

هشام.. ازيك يا خالد 

خالد.. الحمدلله ياحبيبي 

هشام.. ابوك عايز يفلحني من المدرسه

خالد.. ليه؟ 

هشام.. بيقولك عمامك كلموه واقنعوه يقعدني اشتغل معاه في الأرض 

خالد.. متخافش يا قلب اخوك هتكمل علامك حتى لو هشتغل ليل نهار 

المشهد الثاني.. 

خالد.. صباح الخير يابا

أبوه.. صباح الخير يا خالد 

خالد... عايز اتكلم معاك في موضوع هشام يابا

أبوه.. ماله هشام يا خالد 

خالد.. خليه يكمل علامه يابا وانا معاك ومش هسيبك بس نفسنا نبقي حاجه كويسه يابا 

أبوه.. يابني عمامك كلامهم صح أبن الفلاح فلاح وابن الدكتور دكتور وابن الظابط ظابط

خالد.. يابا الأرزاق دي بتاعة ربنا أنت اعمل اللي عليك عشان متشيلش ذنب اخويه هشام دماغه حلوه ونضيفه وطلع الأول في الابتدائيه ودخل مسابقة اوائل الطلبه وطالع التالت علي المحافظه  فحرام عليك تحرمه وبعدين هو احنا أتأخرنا معاك في حاجه.. 

أمه... بص يا حج محمود العيال هيكملوا علامهم لو هنبيع هدومنا اشمعني أخواتك بيعلموا عيالهم ولا عايزين عيالك أنت بس اللي يبقوا مرمطونات ليهم 

خالد.. يابا حبيبك النبي قال علموا ابنائكم فهم خلقوا لزمان غير زمانكم.. 

ابوه.. يعني إيه يا خالد 

خالد.. يعني العلم نور وأول كلمه ربنا نزلها لسيدنا محمد إقرأ

أبوه.. علي بركة الله 

أبوه.. واد يا هشام 

هشام...جاي فرحان قوي نعم يابا

ابوه.. خلاص هتكمل علامك ياسيدي رغم اني كنت اتفقت مع حلاق تروح تتعلم معاه

هشام.. الله يبارك في عمرك يابا وانا والله العظيم أي شغلانه هتقولي عليها هاعملها ربنا يخليك ليا يابا يارب 

أبوه.. يلا بقا عندك 3فرد دقدقه النهارده 

هشام.. بس كده علي عيني وراسي

أبوه.. مفيش لعب كورة

هشام.. ماشي يابا بس كل فين وفين كده ابقي ألعب شويه مع صحابي حتى لو في الجرن هنا هو

أبوه.. ههههههههههه بردو اللي فيك فيك 

هشام.. هتعوز حاجه مني بقي ألحق اخلص الشغل والله إن شاء الله هأخلص ال3 فرد النهارده 

أبوه.. ههههههههههه يا أبن الراجل الطيب بقي ده كله عشان الكوره

هشام... بعشقها يابا بتجري في دمي أنا في مره طفشت من المدرسه يابا بس وحياة رحمه ابوك متزعل مني وروحت نادي ديرب والمدرب لعبني مع العيال اللي عاملين اشتراكات في النادي والله العظيم يابا ابنك جاب 8 اجوان والمدرب قالي هات صوره و15جنيه وانا اعملك اشتراك وبيجي انديه كبيره وبكتشفوا  اللعيبه الصغيره اللي زيك وممكن ابقي لعيب كبير 

أبوه.. يا هشام يابني ابوك فلاح علي قد حاله وكنت بشيل بالقروانه علي كتفي يابني وأحفر بالكريك عشان اربيكم اني مش حمل كده يابني

هشام... ماشي يابا وأنا جنبك بس ابقي سبني العب شويه مع صحابي في الجرن بتاع العزبه 

واوعدك اني مش هأقصر في الشغل حتي لو هشتغل ليل ونهار انت ناسي لما خليت الأرض ورحلتها لوحدي 

أبوه.. ماشي يا حبيبي 

وبصراحه حقك علي راسي بردو انا عارف اني كياد وبغيظك بس هو انا كده اللي بحسه بقلبي بعمله وخلاص ههههههههههه مبحسبهاش فاوقات بعمل تصرفات تجنن العاقل وببقي ليك حق تبهدلني بس أهم حاجه إني عمري ما أطلعت علي حاجه الناس ولا عملتلك مشكلة وحده 

أبوه.. الله الوكيل يابني عمرك ما حد اشتكالي منك ربنا يحميك 

هشام... زيزو

زيزو.. حبيبي ياهش

هشام.. متيجي تساعدني ابوك محمود قاسم عليا قسمه تقيله بس نفسي نلعب العصر سوا 

زيزو.. بس كده يا صاحبي علي راسي 

هشام.. ربنا يخليك ليا يا زيزو يارب أنت تعرف اننا ولاد عم

زيزو.. آه عارف ابويا دايما يقولي دار ابوك الفقي قرايب دار ابوك ابو عوض

هشام... نفسك تطلع إيه يا زيزو خلينا ندردش واحنا بنشتغل ونتسلي في كلام حلو 

ستنتقل الأحداث إلي مرحلة أخري حيث أنّ هشام سيذهب مع زوج أخته للعمل في ورشه في طرة البلد في القاهرة طريق شق التعبان

نهاية الحلقة بمطش كوره جميل يعبر عن الحب بين كل أبناء تلك العزبه البسيطه وذات إسمك براق عزبة البرنس الصغري

نهاية الحلقه بصوره جماعيه مع أغنيه بصوت محمد منير سأكتب كلماتها حين توقيع العقد مع المنتج وأبطال العمل العظام فهذا العمل سيضم عمالقه الفن والأدب بوجه مضيء في سماء التلفزيون المصري 

زيزو... والله ياهش انا نفسي اخلص دبلوم واسافر كام سنه واتجوز وافتح أي مشروع واقعد في وسط عيالي 

هشام.. ربنا يحققلك كل اللي بتتمناه يا حبيبي يارب أنت أبن حلال يا زيزو 

زيزو... والله العظيم ياهشام انا نفسي اجوز من عيلتكم عشان بحبك وعشان نفضل قرايب

هشام.. ربنا يرزقك يا حبيبي يارب واحنا نتشرف بيك والله يا زيزو

إنتهت الحلقه

قلم دكتور مدحت مصطفى

رواية عنيدة فى أحضان الشيطان بقلم الكاتبة /آيه عادل

عنيده في احضان الشيطان 

الفصل الاول 

ساعات المظاهر بتخدعنا وتخلينا مانعرفش مين كويس ومين وحش ، بنحكم علي الناس من بره بس 

انا غاليه عندي ١٦ سنه يتيمه الاب والام وقاعده مع مرات ابويا وبنتها سعاد بعد ما ابويا اتوفي 

في يوم لقيت سماره مرات ابويا زعقتلي وقالتلي

سماره 

اسمعي بقي انتي مش كل يوم هتخرجي بطقم شكل ، خليتي كل الناس تحب طلتك عليهم والعرسان رايحين جايين يطلبوكي ، اما بقي بنتي ياحسره عليها مافيش حد قربلها ولا خبط علي بابها واهي اكبر منك بسنتين 

غاليه 

اعمل ايه يا اما سماره هو كان ذنبي يعني ، وبعدين ياستي انا عندي فكره كويسه اول عريس يجي يخبط دلوقتي علي الباب وريله سعاد بنتك لو وافق خير وبركه 

سعاد 

ليه ياختي هو حد قالك اني رميه ، وبعدين قال علي رأي المثل كل واحد في عين نفسه امير انتي فاكره نفسك حلوه ، يكش بس الحظ عامل معاكي واجب وبتعرفي تلبسي غير كده انتي ولا تسوي 

غاليه 

بقي كده ياسعاد ، انتي عندك حق انا فعلا ماسواش حاجه ، بس افتكري بقي ياعنيا اني انا اللي فاتحه البيت ده من ساعه ما ابويا خفي عن وشكم ، ولولا شغلي ماكنش زمانك عايشه ، ده انتي حتي لبسك كله بتاعي عرفتي مين بقي اللي ولا يسوي 

دخلت اوضتي وسيبتهم يلفو حوالين نفسهم 

وتاني يوم روحت المصنع اللي بشتغل فيه ، وهناك لقيت راجل شكله حلو اوي وله هيبه ، كان شاب في التلاتينات بس كان زي القمر ، لقيته بصلي دون عن البنات كلهم وابتسم وقالي 

عزيز 

قوليلي ياشاطره انتي اسمك ايه 

غاليه 

انت عايز تعرف اسمي ليه يابيه ، عموما انا اسمي غاليه 

عزيز 

ههههه سبحان الله وانا اسمي عزيز ، شوفتي بقي محاسن الصدف انا عايزك تشتغلي عندي سكرتيره انا بفتح اربع ايام في الاسبوع فقط وعندي مكتب مقاولات ايه رايك 

غاليه 

مش عارفه والله يابيه ، بس علي العموم هسأل الحاج رشاد صاحب المصنع وأشوف وقتي ، ممكن الكارت بتاع حضرتك 

لقيت عزيز اداني الكارت وقالي هستناكي 

ومشي عزيز وكأنه عارف ومتأكد اني هوافق ، وقطع سرحاني صوت ناديه زميلتي وقالتلي 

ناديه 

انتي يابنتي انتي سرحتي في ايه ، ماتبصيش لفوق ياختي أحسن اللي بيبص فوق بيتعب اوي ، انتي عارفه مين ده ، ده عزيز بيه النجار رجل اعمال وكل الناس بتتكلم عنه اليومين دول وواخد شغل كتير اوي  للمحلات بتاعته من المصنع هنا 

غاليه 

وايه اللي يخلي واحد زي ده يقف يتكلم معايا ، يالهوي يا ناديه تفتكري يابت الزهر هيلعب معايا وهشتغل معاه 

ناديه 

قولي يارب ياختي انتي زي القمر وبنت حلال وتستاهلي كل خير 

روحت البيت وانا بفكر في عزيز ونبره صوته وشكله وهو بيتكلم معايا وفضلت احلم احلام كتير اوي مش علي مقاسي 

ولما روحت البيت لقيت اما سماره قالتلي 

سماره 

مش تباركي ل سعاد يابت ربنا كرمها وجالها عريس إنما ايه زينه الرجال 

غاليه 

والله فرحتلها يا اما سماره ربنا يتملها علي خير انا هنام دلوقتي وبكره نبقي نتكلم مش قادره اقف على رجلي 

سماره 

لا استني بس ، تنامي ايه انا عايزاكي كل شهر تديني من مرتبك ٢٠٠٠ جنيه عشان هعمل جمعيه كبيره عشان اجهز سعاد ماهي كلها سنه وهتتجوز ومحتاجه حاجات كتير اوي 

غاليه 

وانا مالي يامرات ابويا وبعدين ٢٠٠٠ جنيه ايه انا مرتبي كله ضايع علي البيت والأكل والشرب خليها تنزل تشتغل شويه حرام عليكم 

سماره 

ايه ايه ايه ، بنتي تشتغل ، لا ياختي انا بنتي مش بتاعت شغل انا بنتي معززه مكرمه قاعده في البيت ماتعودتش علي البهدله 

غاليه 

يعني انا اللي بتاعت بهدله ، شكرا ياستي تصبحي علي خير 

سماره 

انا بقولك اهو ياغاليه هتدفعي يعني هتدفعي بمزاجك أو غصب عنك هتدفعي 

قفلت باب اوضتي عليا وفضلت ابكي من كتر الهم اللي انا فيه ، وغلبني النوم

وتاني يوم لما روحت المصنع لقيت عزيز بيه قدامي وقالي انا استأذنت من الحاج رشاد انك هتيجي تشتغلي معايا الكام يوم اللي قولتلك عليهم سكرتيره وهتقبضي في الاسبوع ١٠٠٠٠الالاف جنيه 

سمعت الرقم حسيت أن ضربات قلبي زادت وقولتله 

غاليه 

تقصد في السنه يابيه 

عزيز 

في الأسبوع يا غاليه ، العنوان في الكارت هستناكي بكره 

فرحت اوي وحسيت أن الدنيا خلاص ابتدت تضحكلي وان اللي جاي خير ماكنتش احلم بيه ابدا 

ولما روحت لقيت سماره قاعده هي وسعاد وجايبين حاجات لجهازها وقالت 

سماره 

انا جيبت شويه الحاجات دي من عم عبده بتاع القسط وقولتله هديك الفلوس اخر الشهر عشان لما تقبضي تدفعي ياست هانم 

غاليه 

حسبي الله ونعم الوكيل فيكم ، انا مش مسامحه في اللي بيحصل ده انتو عارفين انا لو ليا مكان تاني اروحه كنت روحته وارتحت منكم 

وتاني يوم روحت ل عزيز بيه المكتب ، كان مكتب كبير اوي وفيه ناس رايحه جايه ، ولقيت عزيز بيه مستنيني في مكتبه واول ماشافني قالي 

عزيز 

اتفضلي اقعدي يا غاليه ، انا حطيت عيني عليكي انتي بالذات عشان وشك جميل جدا وملفت شكلك كله علي بعضه مش بتاع شغل مصانع ، انتي تبقي صاحبه شركه وتيجي تقعدي علي الكرسي ده بدالي

قولتله وانا قلقانه انت تقصد ايه يابيه انا مش فاهمه حاجه 

عزيز 

يعني انتي هنا وجهتي يا غاليه وعايزك لطيفه مع العملا وكل ماهيعجبني شغلك هزود مرتبك 

غاليه 

طبعا يابيه هيعجبك شغلي انا من ايدك دي لايدك دي ، ربنا يزيدك من نعيمه يارب 

روحت قعدت على مكتبي الجديد وابتديت اشتغل 

وفضلت علي الحال ده شهر ، وسيبت المصنع وبقي شغلي يعجب عزيز بيه ، بس كان تملي بيبصلي بنظرات غريبه ماكنتش بعرف اميزها

وفي يوم قعدت معاه في مكتبه وقالي 

عزيز 

قوليلي بقي يا غاليه انتي مخطوبه أو بتحبي 

غاليه 

يابيه انا يتيمه وعايشه اشتغل عشان ااكل نفسي وااكل مرات ابويا وبنتها ، واحافظ علي شرفي وسمعتي ، اللي زيي لازم يمشي جنب الحيط ولا ليا في حب ولا غيره 

عزيز 

يعني انتي معيشه مرات ابوكي وبنتها معاكي حتي بعد وفاه ابوكي 

غاليه 

مش بايدي يابيه ، غصب عني حكم القوي ابويا الله يسامحه كتب نص الشقه باسمي والنص التاني باسمها عشان كده مجبرين نعيش سوا ، وعشان اتقي شرهم بعملهم اللي هما عايزينه والا هدخل في مشاكل مش قدها وانا ماليش مكان اعيش فيه 

عزيز بصلي وقالي انتي شوفتي كتير اوي يا غاليه ، تصدقي انا من اول ما شوفتك حسيت أن حكايتك حكايه ، كفايه انك جيبتيني تحت رجلك وخليتي النوم مايعرفليش طريق جره، من زمان وانا نفسي احب بنت بمواصفات معينه ، ولما شوفتك لقيت البنت دي 

قولتله وانا متوتره انت تقصد مين ، تقصدني انا يابيه 

لقيت عزيز قرب مني جدا وخوفت وجريت منه وقبل ما افتح باب المكتب بتاعه عشان اهرب جري عليا .....

يتبع 

مستنيه تقولو رايكم ياغوالي قلبي وماتنسوش التوقعات ياملوك التوقعات وماتنسوش اللايكات والكومنتات عشان استمر ♥️♥️

اشوفكم بكره الساعه ٤ العصر في الفصل الثاني 🤍🕊️

حلقات مسلسل بقلم الدكتور مدحت مصطفى

الحلقة الأولي... 

المشهد الأول.. هشام بطل المسلسل يعمل في الأرض مع والده الحاج محمود 

هشام.. يابا انا عايز ألعب كورة مع صحابي 

ابوه..  تلعب كورة ليه؟ 

هشام.. نفسي أفك عن نفسي شويه واعرق كده وجسمي يفك يابا

أبوه.. أعرق في الأرض فك نفسك مع الفاس

هشام.. يابا في فرق بين الشغل والرياضه يابا

أبوه.. كله عرق ياهشام يابني وبعدين احنا غلابه وبتوع مصالح يابني والكورة عمرها ما هتفتح بيت

هشام.. ماشي يابا وأنا عمري ما قصرت معاك في الشغل.. 

بص يابا أقسم عليا من بالليل قولي وراك كذا وكذا وأخر النهار حاسبني لو قصرت. 

أبوه.. ماشي يا سيدي دقدق فردة قطن كل يوم وأعمل الزريبه والمربط وهات برسيم للبهايم والعب براحتك 

هشام.. يانهار أبيض يابا دا شغل خمس رجاله 

أبوه.. ههه مش أنت عايز أقسم عليك. 

هشام.. أه يابا تقسم عليا مش تهد حيلي وعموماً أنا موافق 

المشهد التاني... 

هشام.. بإذن الله لازم اشد حيلي وأخلص كل اللي أبويه قال عليه عشان ألعب كورة.. 

خلص الزريبه والمربط وفك الحمار وطلع علي الغيط حش البرسيم وحمل الحمل ورجع. ربط الحمار وطلع البهايم علي المربط وحط ليهم برسيم وخد العواقه ولبس الكورة معاه في الكيس وطلع علي الغيط وسمى الله وفضل يشتغل ويدقدق في القطن لحد ما خلص الحمدلله.. 

المشهد الثالث.. 

طلع على الترعة نزل اشطف فيها وغير لبس الكورة وطلع جري علي الملعب لقي يحيى وفارس وسعيد وخيري وإبراهيم والشلة كلها موجوده وهوبا وزيزو وعوض لعبنا وافرحنا.. 

خلص لعب واستأذن قبل صحابه عشان يلحق يدخل البهايم عشان أبوه مش يزعل.. 

المشهد الرابع... 

أبوه.. لعبت بردو.. 

هشام... مهو أني خلصت كل اللي أنت قولت عليه

أبوه.. طيب أعمل حسابك بكره تدقدق فردتين قطن

هشام.. يانهار أبيض يابا فردتين كتير عليا موت

أبوه.. انت حر طالما نفسك تلعب

هشام ماشي يابا قول يارب 

المشهد الخامس.. 

هشام.. ازيك ياما 

أمه.. الحمدلله ياحبيبي 

هشام.. خلي أبويه يخف عليا شويه ياحجه

أمه.. ليه ياحبيبي عمل ايه 

هشام.. قاسم عليا الزريبه والمربط وبرسيم البهايم وفردة قطن بعرض الارض ودلوقتي بيقولي تدقدق فردتين دا أنا لو حمار في الوسيه هفلس منكوا 

امه.. هههه ربنا يديك الصحه يا حبيبي حاضر هأكلمه

المشهد السادس.. 

أمه.. بقولك يا حج

أبوه.. نعم يا أم خالد (خالد ده الأخ الأكبر لهشام) 

أمه.. خف علي الواد هشام شويه وخليه يفك دمه زي صحابه

أبوه.. يا أم خالد انا بقرص عليه عشان ينشف ويعرف قيمة الحياة انما عمري ما أكرهه.. في حد يكره ضناه يا أم خالد 

أمه.. يا أخويه عارفه بس والله الواد صعب عليا وشه أحمر زي الدم من الشغل.. 

أبوه.. يرحم نفسه من اللعب شويه حد قالة يلعب كورة

أمه.. ياراجل حرام عليك يعني كل الشغل اللي انت قاسمه عليه مش عاجبك وشويه الجري اللي بيفكوا دمه هما اللي واقفين في زورك.. 

أبوه..  اصبري بس اصل الواد ده عنيد موت ودماغة صلبه وعايز اشوف يا أني يا هوه.. 

أمه ربنا يهديك يا راجل وضحكااا معاً ههههههههههه 

المشهد السابع... 

صحي بدري وطلع جاب برسيم علي الندى ورجع عمل المربط وطلع البهايم وقطع الزريبه وخد عوقتين زياده معاه وطلع علي الغيط.. 

وفضل يدقدق بحماس ويقعد ياخد نفسه ويرجع يدقدق تاني لحد ما صحابه صفروا ليه عشان يورحوا الملعب.. 

هو صفر صفاره ليهم وشارولهم تعالوا فنزلوا في الأرض.. 

بقولك ايه انت وهو.. ابوك الحاج محمود قاسم عليا اخلص الفردتين دول عشان ألعب ويا أني يا هو محبش حد يلوي دراعي أبداً ولا يحرمني من حاجه بحبها فكل واحد يمسك عواقه نخلص ونروح نلعب.. 

بس كده يلا يا صاحبي... 

خلصنا وطلع خد غطس في الترعه ولبس وراح لعب ولما رجع من اللعب وبيدخل البهايم.. 

ابوة.. أعمل فيك إيه ياض أنت 

هشام.. في ايه يابا

أبوه.. يعني قاسم عليك شغل خمس رجاله عشان تفلس وبردوا مفيش فايده 

هشام.. تصدق بالله يابا

أبوه.. لا إله إلاّ الله 

هشام.. مهما تعمل هألعب يعني هألعب يابا حبيبك النبي قال لعبوا اولادكم سبع وعلموهم سبع وصاحبوهم سبع 

وانت ماشاء الله عليك واخد ال 21سنه مرمطه فيا 

أبوه.. ههههههههههه ياأبن المجرم مشكلتي مش بعرف أرد عليك 

أبوه... طيب أعمل حسابك بكره تدقدق 3فرد!!! 

هشام... بقولك يابا 

أبوه.. نعم

هشام... هو انا ابنكوا حق وحقيقي ولا لقيني علي باب جامع وبتشغلوني بلقمتي.. 

أبوه.... ههههههههههه يا أبن الراجل الجدع بعلمك حاجه للدنيا 

هشام.. يابا علمني مقولناش حاجه بس انا لو في الصاعقة هيخفوا علينا شويه.. 

أبوه... ربنا يديك الصحه يا حبيبي بس نفسي اسمع منك والنبي يابا عشان خاطري خف عليا شويه ياض أنت عمرك ما أتحايلت عليا في حياتك.. 

وبعدين انت رايح تكلم امك يا أبن امك مش تيجي تكلمني علي طول ليه 

هشام.. دايما يابا صاحب المشكله أو العله بيكون حجته ضعيفه في الدفاع عن نفسه... انما لما أمي ولا خالد اخويه يكلمك في حاجه تخصني هيتكلم معاك براحته.. 

أبوه.. طيب إيه رأيك عايزك معايا علي طول في الأرض 

هشام... يعني ايه مهو أنا معاك أهه

أبوه.. لا عايزك افلحك من المدرسه

هشام... الدموع هتنط من عينه ليه يابا بالله يابا سيبني أكمل علامي واني والله خدامك مش هقولك علي شغلانه لأ 

أبوه.. علام أيه يابني.. أطلع ساعدني أتعلم صنعه أو مهنه تاكل منها عيش 

هشام... بالله عليك يابا خليني أكمل زي أخويه أستحلفك بالله ابوس ايدك يابا... 

أبوه... لالا أنا اتكلمت مع عمامك وقالوا فلحوا معاك في الأرض أبن الفلاح فلاح وابن اللوا لوا وكلامهم صح... 

إنتهت الحلقه 1

قلم دكتور مدحت مصطفى

قرآن سعيد دكتورة ايمان العقيلي والشاعر مصطفى الجارحي

تم بحمد الله تعالى عقد قرآن الشاعرة الجميلة دكتورة أيمان العقيلى على الشاعر الكبير مصطفى الجارحي 

الف مبروك لعقد القران السعيد وتمنياتنا بحياة سعيدة مليئة بالحب 

الدهشة بقلم الشاعرة / حورية بنت الخير

.....الدهشه .....

 بعد ماطلعت روح الايام 

رسم 🖌 الضحكه 

في وش الغضب 

والدهشه  ف صبرك

عايش عمرك 

عكس حياتك 

ولسا مكمل 

وجسم الدنيا بيتعكز 

علي كهل عويل......

وبقينا نكشر ونبوز 

في وشوش الطيبه 

وجفينا الحب ♥ 

وشريان القلب 

بيبخ سواد.....

واتلوس دم البشريه 

والروح بإديها بترميني

في حضن الريح 

عاوزاني اصد

عواصف وحروب 

ونا  لسا يدوووب 

اول حبايه 

في سبحة احلامي 

هاتصدق صوت الحكمه 

بنت العقل.....

بتنادي سفينه محمله 

بضماير وضفاير إخلاص 

وركبت معاها 

ومسكت في حبل الأفكار 

اتاريه بيكر في اوهام.....

وجمال الأشياء خذلوووه 

وترشح نجم جديد 

وبمكره فاز باللعبه 

وف لعبه ......

بقي هو الحاكم....

وصبحت ارض الكون

 متلغمه بالزيف 

بس هايجي ف يوم

وتنبت ياسمين.....

في غياب الكل 

هايقول الحاضر....

الدنيا نهايه لبدايه جديده 

والدهشه ف صبرك 

عايش عمرك......

عكس حققيتك......

ولسا مكمل.....

لسا   مكمل ...

...................

حوريه بنت الخير

ليلة ولا الف ليلة وليلة بالملتقى الثقافي بعرب العيايدة

ليلة من الف ليلة وليلة 

جم أحترامى وشكري وتقديرى

 للملتقى الثقافى بمركز عرب العيايدة 

تحية لكم من القلب لحفاوة الترحيب والاستقبال 

شكرا لأنكم منحتونا فرصة جيدة للتذوق والأستماع والأستمتاع 

بجميع الحضور الكريم فا والله لما أراى منكم الا كل جميل وتفانى 

فى إيثار الغير عن أنفسكم وأندثرت لغة الآنا  

بل كانت معدموه وليس لها وجود فى ملتقاكم المبدع 

تحياتى لجميع الحضور الكريم كلا  بأسمه وصفته وكل من تكبد عناء ومشقة الحضور  

تحياتى لأعضاء مجلس إدارة الملتقى الكرام 

الشاعر محمد جودة رئيس مجلس الإدارة 

الأستاذ عرفات صقر المنسق العام للملتقى 

الأستاذ الشاعر سيد مرسي الداعم الثقافى للملتقى 

الإعلامية القديرة والمتميزة مقبولة نور الدين 

لكم منى كل الحب والأحترام والتقدير 

وتمنياتى بالمزيد من التألق والإبداع 

الإعلامية نسرين العشري 

إيزيس همسة حب