رواية "ناير "
لحد ما الحاج "فكرى العياطى " واحد من كبار أشراف النجع وكلمته مسموعه قالهم على فكره ممكن توقف النزاع بين أهالى النجع وتحل المشكله !!
طلب منهم يعملوا قرعه بالورق , ويكتبوا أسامى كل الناس اللى فى النجع , ويجيبوا أصغر عيل فى النجع وهوه اللى يختار , واللى يطلع أسمه فى القرعه يبقى حلال عليه ياخدنى وسط عياله !!!!
وبالفعل عملوا القرعه , بس حصلت مشكله تانيه , كل ما أسم حد يطلع فى القرعه الناس تعترض عليه ويطلعوا فيه القطط الفطسانه ويقوله كل عيوبه , فيعملوا القرعه من تانى , فيطلع أسم تانى يطلعوا فيه القطط الفطسانه ويعترضوا ....وهكذا
وبالفعل بقيت كل سنه فى بيت شكل, مره فى بيت ناس غنيه أوى فى النجع، ومرات تانيه كتيره فى بيت ناس مش لاقين حتى كسرة العيش، على حسب ماتحدد القرعه فى آخر السنه.
فيه اللى كان بيعاملنى كويس ,ويعاملنى كويس دى يعنى يأكلنى ويشربنى ويدينى مكان أنام فيه ,ودول كانوا قليلين أوى فى سنين حياتى وفيه اللى بيعاملنى بالسخره ويشغلنى عنده ببلاش من غير حتى مايأكلنى أكله عدله ودول ما أكترهم فى سنين حياتى !!!
أتعلمت كل حاجه وكل صنعه ممكن تتخيلها، وأتقنتها علشان أنا دماغى نضيفه وبفهم بسرعه , وعرفت من قعدتى فى بيوتهم كل أسرارهم وأسرار عيالهم ومراتتهم ,أتأكدت أن نجع "الشرفاء " كله ناس واطيه !!!
أحسن سنتين قضتهم فى حياتى كانت سنه قضتها فى بيت الدكتور "عمر" , وده راجل محترم وكان عايش لوحده فى فيلا كبيره , علمنى القراءه والكتابه وشوية حاجات فى الطب وكنت بتمنى أكمل سنينى اللى جايه معاه ,وقتها كان عندى 9 سنين .
والسنه التانيه كانت فى بيت "عفاف" الحفافه , كنت أحسن واحد يعمل حلاوه فى البلد ...لا ...مش اللى فى دماغك خالص , بعمل حلاوه يعنى بصنعها !!
نسيت أقولك أنا أسمى ناير , تسألنى وتقولى :
طب وأنت ياناير نفسك تدخل بيت مين ؟
أقولك :
بيت رقم 8 فى النجع !! البيت اللى كنت كل سنه بتمنى القرعه تيجى عليه, مش بس كده أنا كنت ههرب من النجع وأنا عندى 14 سنه، بس أستنيت على امل القرعه تنصفنى فى مره وترمينى فى بيت رقم 8.
تقولى :
طيب بيت مين ده ياناير وأشمعنى ؟
فتح الحاج فكرى الورقه وقال فى ميكرفون الجامع :
دياب الضباعى!!! الساحر !!
ماصدقتش لوهله أن حلمى أتحقق على آخر لحظه , وبالرغم من أن كله كان مصدوم من القرعه السنه دى !!! بس أنا كنت هطير من السعاده.
نادى الحاج فكرى فى الميكرفون تانى على دياب الضباعى, علشان يجى ياخدنى , مجاش برده !!!
فقال فى ميكرفون الجامع :
أظاهر أنه مش موجود فى النجع دلوقتى , روحله ياناير يابنى بيته وأستناه هو بيته رقم 8
كنت عايز أقول للحاج فكرى :
ده انا حافظه صم...
وبالفعل روحت ناحية بيت دياب الساحر وأنا طاير من الفرحه ومش مصدق نفسى , خبط على الباب مره واتنين وتلاته أظاهر أنه مش موجود وبره النجع فعلا.
فقعدت على صخره كانت قدام بيته وطلعت كوزين ذره مشوي وقعدت اكلهم وأنا مستنى دياب يرجع من بره وأستينت كتيير أوى!!!!
وقتها النجع كله كان متجمع فى الساحه علشان يعرفوا مين اللى قتل " المعلم عطوه" الجزار وكانوا شاكين فى تلاته , مراته وأخوه والخدامه فجابوا عم دياب الساحر يفتح المندل علشان يقولهم من اللى قتل عطوه .
وقف دياب فى الساحه وقالهم :
أختاروا حد من النجع بالغ عاقل تكونوا بتثقوا فيه.
فأختاروا الدكتور "عمر" اللى طلع على المنصه وسلم على دياب بحراره فقعده دياب على الكرسى فوق المنصه ومسك الميكرفون وقال :
غمض عينك يا دكتور ومد كفين أيدك لقدام ووازى بطن كفوفك الاتنين ببعض , كأنك هتسقف !!!
فنفذ الدكتور اللى طلبه دياب ومد أيده كأنه هيسقف بس من غير مايسقف.
فملس دياب على راس الدكتور وهو بيقول كلام مش مفهموم وبسرعه وأخره جملة
الطاعه لله !!
وقال فى الميكرفون :
انا مش عارف أحرك أيدى !!! ومش قادر اتحكم فيها !!!
فطمنه دياب وطبطب على كتفه ,ومسك الميكرفون وقال :
لو كان قاتل عطوه أبن زينات , أخوه فا أفتح هذا الكفين وأخبطهما ببعض .... الطاعه لله ...الطاعه لله
فمحصلش حاجه !!
فكمل وقال :
لو كان قاتله صفيه خادمته فأخبطهما فى بعض .. الطاعه لله .. الطاعه لله
فمحصلش حاجه برده !!
فى المره التالته وهو بيقول أسم مرات عطوه , الدكتور أيده فضلت تسقف .. تسقف... تسقف.. كتيير ورا بعض !!!
فالناس هللت ......الله أكبر .. الله أكبر .. ظهرالحق..
فجأه وانا قاعد على الصخره ,لقيت دياب طالع من بيته!!!!
جريت وراه وقلته أزيك ياعم دياب انا ناير أكيد عارفنى , القرعه أختار...
رجعت تانى وقعدت على الصخره وكدبت عقلى وقلت يمكن من كتر رغبتى فى أنى اقابله وأقوله ان القرعه أختارته فتوهمت انى شوفته!!!
قعدت مستنى قدام باب البيت اللى مقفول وعدى حبه حلوين لدرجه أن الصبح طلع !!!
عمى دياب.... القرعه أختارا....
ببص لقيته أختفى برده !! , كده عم دياب بيشتغلنى !!!
رجعت وقعدت على الصخره اللى قدام باب بيته تانى .. وببص على الباب أتفاجأت بمشهد خلانى فاتح بوقى من الدهشه....
بيت دياب مالوش باب أصلا ... دياب قدامى قاعد مقرفص فى وسط بيته ومولع منقد نار , بيبصلى بعينه اللى لونها أحمر زى الجمر !!!!!
أى حد مكانى كان حقته ياخد ديله فى سنانه ويجرى , بس أنا غير أى حد , قربت من بيت دياب اللى مالوش باب !! ودخلت لجوه ,ببص قدامى لقيت دياب أختفى تانى من قدامى، وحسيت بهوا سخن اوى فى قفايا , فببص ورايا لقيت عم دياب طويـــــــــــــــــل أوى لدرجه أن راسه واصله سقف بيته !!!!ووشه ممسوح !! فاضى مالوش ملامح !!!
قعدت أسقف وأنا بقوله :
حلوه أوى الحركه ياعم دياب ,عملتها أزاى والنبى !! , بص أنا كمان بعرف أعمل حاجات سحر.
أنت عبيط يله , المفروض تخاف وتجرى !!!
قولتله :
أنا غير أى حد أنا نفسى أتعلم السحر وكنت بتمنى القرعه ترمينى فى بيتك سنه , علشان تعلمنى كل الحاجات الحلوه اللى بتعملها دى
فقالى بعصبيه :
غور يله من هنا مابعلمش حاجه !!
سيبته كأنى مسمعتش حاجه ودخلت قعدت على الكنبه اللى فى نص البيت وحطيت شنطتى جمبى وفتحتها وطلعت هدومى وحاجتى وقولتله :
هتنيمنى فين ؟!! ,أقولك أنا هنام هنا على الكنبه أرتحتلها كده !!
لقيته جه ولم هدومى وحاجتى جوه شنطتى وأديهالى وهو بيزقنى وبيقولى :
يله ياااد من هنا ... أمشى !!!
قولتله :
مينفعش أنت عارف القرعه وطول مانا فى ذمتك السنه دى ,محدش هيرضى يدخلنى بيته ,وأنت مايرضكش أنام فى الشارع برده ياعم دياب !!!
سكت شويه وقاللى :
بس أنا مش قاعد لوحدى
وبص حواليه فى الهوا !!
قولتله :
معاك جن وكده... طيب كويس عرفنى عليهم
فملى صدره بالهوا وطلعه بعصبيه وهوه بيقول :
بص ياااد انت لو هتقعد معايا هنا ,هيبقى أخرك اأكلك أشربك وأخليك تنام على الكنبه دى , بس قسما بربى لو فتحت باب الأوضه دى.....
وشاور على أوضته
مش هيحصلك طيب , هسخطك قرد !! فاهم !!
فقولتله:
مددت راسى على الكنبه وبصيت فى السقف وقعدت اتخيلنى وانا ساحر زى دياب
صباح الخير ياعم دياب..
عنك ياعم دياب السطل أملاه أنا..
هتعلمنى السحر أمتى ياعم دياب ؟!!!
بصلى بقرف وماردش عليا برده , مسبتوش برده وفضلت ماشى وراه , وعلى كده كل يوم أفضل أزن عليه
هتعلمنى السحر أمتى ياعم دياب .. عمى دياب ..علمنى السحر ... عمى دياب ..علمنى السحر..
فضلت أزن على ودانه , وأنت عارف أن الزن على الودان أمر من السحر !!!
وفى يوم وهوه خارج يملى السطل زى كل يوم , عملت نفسى نايم ومطلعتش وراه , بصيت بنص عينى لحد ماأتأكدت أنه مش من البيت , ونطيت من على الكنبه وروحت ناحية أوضته فتحتها.
الاوضه من جوه مليانه كتب مترصصه على الآرفف و فيه منها مرصوص على الأرض , لفيت بعينى فى الأوضه فلقيت صندوق خشب صغير شكله غريب وشدنى كده فروحت ناحيته , فتحت الصندوق وأتسمرت مكانى من اللى شوفته جوه الصندوق !!!
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.