رواية "ناير"
الفصل الثاني بعنوان"لعنه!!!"
الاوضه من جوه مليانه كتب مترصصه على الأرفف و فيه منها مرصوص على الأرض , لفيت بعينى فى الأوضه فلقيت صندوق خشب شكله غريب وشدنى كده فروحت ناحيته , فتحت الصندوق وأتمسمرت مكانى من اللى شوفته جوه الصندوق !!!
الصندوق جواه سبحه كبيره وحجر أزرق غامق فى حجم الزلطه, وصورتين هما دول اللى خلاونى أتسمرت مكانى !!
الصوره الاولى لراجل شبههى بالظبط!!! متصور لوحده وهو لابس بدله سودا والتانيه لنفس الراجل بس جمبه واحده لابسه فستان أبيض ومتصور جمبهم عم دياب !!
حسيت بهوا سخن فى قفايا , ببص لقيت عم دياب ورايا .
بصتله ومش عارف أعتذرله ولا أساله على الصور فقولتله:
أنا... الصور ... والله ماكانش قصدى.. لقيت الاوضه مفتوحه ...
مردش عليا بس بصلى بصه بعنيه خلت قلبى هيتقلع من جذوره من كتر الرعب , مع أنى عمرى ماخوفت من حاجه , بس شوفت حاجه فى عينه رعبتنى لدرجه خلتنى أرمى الصور على الأرض وأجرى بره البيت , ببص عل البيت على البيت وأنا بجرى لقيته رجع بقى ليه باب !!!بس المره دى باب حديد !!
عدى حبه وقت مش كتير , ورجعت تانى للبيت وخبطت على الباب الحديد , محدش فتحلى , رجعت قعدت على الصخره أستنى عم دياب وهو طالع يملى السطل علشان أعتذرله وأساله مين دول اللى فى الصور ؟!!!
عدى يومين وأنا مستنى عم دياب يفتح الباب الحديد , بس الباب مااتفحتش خالص طول اليومين !!!
قعدت مستنى على الصخره وأنا بقول لنفسى والله لو سنتين هفضل قاعد لحد ماتطلع ياعم دياب
الليله التالته كانت برد شديد أوى , وبرق ورعد ومطرت سيول , طلعت هدومى من الشنطه ولبست منها على أد ماقدر فوق بعضه علشان البرد بس لسه بردان برده , وهدومى كلها غرقت مايه من المطر , فلبست شنطتى وهى فاضيه فوق دماغى , اللى غرقت برده ,نزلت تحت الصخره اللى قاعد عليها وحاولت اعمل نار بس كانت بتتطفى من المطر , كنت هموت من البرد
بصيت على بيت دياب لقيت الباب الحديد أختفى ولقيته واقف قدام بيته بيشاورلى أدخل !!!
خدت حاجتى ودخلت البيت وأنا جسمى بيرعش وسنانى بتكتك وبتخبط فى بعضها من البرد وجريت على منقد النار اللى عامله دياب يدفى بيه وكان هاين عليا أرمى نفسى فيه علشان أتدفى ,دخل دياب أوضته وشويه ورجع وفى أيده كلسون وجلابيه وبطانيه وقاللى وهو بيرميهم عليا :
غير هدومك المبلوله دى وألبس دول علشان ما تعياش
قولتله :
والله ياعم ديا...
قطع كلامى وقال :
أياك تكسر كلمتى تانى , وقعدتك هنا بالأكل والشرب وأياك... أياك تجيب سيرة علمنى السحر دى تانى فاهم ؟!!!
قولتله بصوت مسموع :
فاهم ياعم دياب
وقلت لنفسى :
فاهم مؤقتا بس
راح أوضته ورجع بصنيه فى أيده فيها رغفين عيش وطبق رز وطبق شوربه وحته لحمه وقاللى :
كل وأشرب الشربه علشان تدفى جسمك
قولتله وانا بشرب الشوربه :
عم دياب صور مين اللى لقيتها فى أوضتك دى ؟!! ومين الراجل اللى شبههى فى الصوره ده هو انت تعرف أبويا وأمى ؟!!
وشه اتعكر لما أفتكر أنى دخلت الأوضه .. وفضل ساكت مردش وشويه وقاللى:
اها أعرف أبوك وأمك , هو حد فى النجع ميعرفش أبوك " طلب " أمام الجامع اللى الناس كلها كانت بتحبه , أبوك كان صاحبى زى ماهو صاحب كل الناس الى فى النجع
فقلتله :
بس أنا أول مره أشوفه ... يعنى أشوف صوره ليه ... محدش فى النجع كله عنده صوره ليه , أشمعنا أنت اللى محتفظ بصورته ، لا وكمان فى أوضتك !!!؟ وليه ماقولتليش أصلا؟!!
فقالى :
زى ماقولتلك ابوك كان صاحبى زى ماكان صاحب كل الناس , ولما شوفتك أفتكرته وطلعت الصندوق أياه ودورت على الصوره وكنت هقولك بس أنت ماشاء الله عليك فرااك وكسرت كلامى ، وكل بقى وأنت ساكت ...
قالها وسابنى ودخل أوضته وقفل بابه
تانى يوم الصبح لقيته بيركب قفل كبير على باب أوضته , ركب القفل ودخل الاوضه وقفل على نفسه
أستنيته يطلع علشان يملى السطل فماطلعش , فخبطت على أوضته و انا بقول من بره:
عم دياب ...مش هتملى السطل النهارده ؟ !!
فجالى صوته من جوه وهو بيقول :
روح أملاه أنت , عندك بره
فخدت السطل مليته وجيت, خبطت على باب أوضته
فقالى :
هااااا
قولتله :
أنا مليت السطل أهوه ... هتعلمنى السحر أمتى !!؟
لقيت بابه بيفتح بعنف وبصلى بصه غريبه وخد السطل ودخل بيه أوضته ورزع الباب !!!
وعلى كده كل يوم , فضلت أملى السطل و أجى ازن عليه , فى مره كان بره البيت , بيفتح المندل فى نجع جمبنا , ونسى يقفل القفل بتاع الأوضه !!
حاولت أنتهز الفرصه وأدخل أوضته تانى ,ويدوبك مديت أيدى على المقبض الحديد و عينك ماتشوفش النور
فولت كهربا عالى مسك فى جسمى خلانى بتنطط ذى الفشار
وفى يوم كنت بزن عليه كعادتى
فلقيته بيقولى :
أرحم أمى.. أنزل من على ودانى .. هعلمك أم السحر روح هات المصحف وتعالى
قولتله :
مصحف !!؟ أنا عايز أتعلم السحر !!!
فقالى :
هات المصحف وبطل مناهده يابنى والنبى ..وكمل كلامه وهو بيشد فى جلبيته وبيجز على سنانه
وقال :
من يوم ماجيت وأنت رفعتلى الضغط ومفيش جنى عارف ينزلهولى !!!
جبتله المصحف , فقعد قرفص وخلانى أقرفص قدامه
فقال :
بسم الله الرحمن الرحيم , أولا أمسك المصحف ده وأحلف أنك مش هتستخدم أى حاجه من اللى هتتعلمها سواء منى أو من نفسك فى أذيه الناس ,و أنك هتستخدمه بس فى الخير
فاهم !!!؟
قولتله :
طبعا فاهم أنا أص...
فقالى بنفاذ صبر :
أحلف يابنى !!!
فحلفت على المصحف أنى مش هستخدم السحر فى أذية أى بنى آدم وأنى هنفع بيه الناس
فخد منى المصحف وحطه جمبه وقال :
أنك تتعلم السحر مش حرام لو كان ده بغرض الوقايه من السحره أو لنفع الناس , أهم حاجه ماتخرجش عن المله , بالعكس تتقرب من ربنا أكتر .... سيدنا عمر رضى الله عنه قال :
(تعلمت السحر , حتى لا أسحر ) ولمعلوماتك تسخير الجن عامة حرام لانه بيتطلب الخروج عن المله فاهم ؟
قولتله :
فاهم ياعم دياب , بس أنت كده يعتبر خارج المله !!!؟ مش أنت مسخر جن !!!؟
فقال :
أنا محضرتش جن أنا ورثتهم عن أبويا وانا عندى 21 سنه وأبويا كان ورثهم عن جده واللى ورثهم عن جدود جدوده , بالعكس أنا لما أبويا مات وجالى الجن بتوعه أنا روحت لسحره كتير علشان يصرفوهم عنى وكلهم فشلوا فأضطريت اتعامل معاهم وسخرتهم لخدمة الناس من غير فلوس , علشان لو عليا ذنب أبقى كفرت عنه وأتمنى من ربنا يرحمنى ويغفر لي لما أموت ..
أنا ما أخترتش أنى أتعلم السحر زيك , علشان كده لازم أحذرك
وتاخد اللى هدهولك بس ومتحاولش تتعمق أكتر من اللى هدوهولك , فاهم ؟!!
قولتله :
فاهم ياعم دياب
وقلت فى بالى :
أخلص .. علمنى
فقال :
علم السحر كبييير أوى لأنه عالم تانى ليه قواعده وقوانينه , أنواع السحر كتيره
فيه السحر المجازى وده زى الحركه الهبله اللى انت عملتها أول ماشوفتنى بيبقى غرضه الترفيه ودى بيعتمد على خفة الحركه وعلى أدوات بتدخل فيها الكميا والفيزياو غيرها
وفيه السحر التخيلى :
زى ماشوفتنى طويل وماليش ملامح وبيعتمد على سحر أعين الناس زى سحرة فرعون ماخلوا الناس تشوف الحبال ثعابين !!
وفيه السحر المؤثر وده بيأثر على الشخص المسحور فى جسمه اوعقله أو قلبه وده بيعتمد على العزائم والطلاسم وطبعا تسخير الجن
دى أنواع السحر ....
السحر نفسه بينقسم لشقين أبيض وأسود وباين من أساميهم , الأبيض لمنفعة الناس وعلاجهم من السحر وقضاء حواجهم وضالتهم فى الخير زى مثلا عيل تايه وغيره وفيه الأسود ده علشان أذية الناس زى التفريق بين الزوج وزوجته او الربط السفلى أو التلبيس وغيره
فقولتله :
أنا كنت قريت مره فى مكتبة الدكتور عن السحر الأحمر وأنه ميكس بين الاتنين ؟
فقالى :
شكلك ناويها من بدرى أوى !!!... لا ياسيدى مفيش حاجه أسمها السحر الأحمر , السحر الأحمر سموه كده علشان كان فيه سحره كانوا بيكتبوا الطلاسم والعزائم بالحبر الأحمر
وكمل كلامه .....
وقال :
أزاى تعرف أنك معمول لك سحر ؟
وجاوب على نفسه وقال :
لو مثلا عندك صداع دايم وقوى بدون سبب أو بتخرج منك ريحه وحشه مهما أستحميت !! او عينك بتدمع كتير من غير سبب !!! أو بتشوف كوابيس كتيره وأنت نايم و لو الست بتجهض على طول من غير تفسير طبى تبقى مسحوره , لو بستمع أصوات بتهمسلك فى ودنك ولو على طول بتشوف حد واقف جمبك كل ماتنام على السرير !!!
كلها أعراض لتعرضك للسحر بس ده فى حالة لو الطب عجز فى العلاج !!!
أما بقى المس الشيطانى بتبقى أعراضه :
أنك مثلا تشرب مايه كتيره على غير ماانت متعود وريحة بوقك بتبقى على طول وحشه ؛و فيه ناس بتجيلها أعراض المس الشيطانى على هيئة جنون العظمه بيبقى البنى آدم والعياذ بالله متكبر زى الشيطان ماتكبر على ربنا , وناس تانيه يجيلها المس على النقيض تماما فتلاقى الشخص الممسوس بيلعب فى القذاره .....
علمنى حاجات كتيره أوى عن العلاج بالقرآن من المس الشيطانى وقاللى انه بيحاول يبعد بقدر الأمكان عن اى حاجه ممكن تأذى أى بنى آدم علشان كده بيتفح المندل براجل بالغ على عكس كل السحره اللى بيفتحوه بعيل صغير , علشان فيه تعزيمه لازم تتقرى على الواد الصغير علشان تصرف الجن بعد مايفتحوا المندل ولو العزيمة دى أتقرأت غلط هتبقى مشكله كبيره على الطفل وجسمه مش هيستحمل خروج الجن منه !!!
بقيت بروح معاه فى مشاويره فى النجوع اللى جمبنا وأشوفه وهوه بيفتح المندل وبيستدعى جنى من جن عمار المكان ودول بيبقوا جن موجودين فى كل البيوت بس مبيأذوش صحاب البيت , يبستدعى حد منهم ويفتح المندل و يسأله على اللى حصل !!!
انما بقى لو هيطرد جن لابس بنى أدم فى البيت , لازم يقول عزيمه يصرف بيه جن عمار البيت لأنه هيستعين بجن من بره يساعدوه فى طرد الجن اللى لابس البنى آدم , وممكن تحصل خناقه بين الأتنين جن العمار و اللى جن اللى جاى من بره !!!!
سألته ليه بيوت السحره فيها حيوانات متحنطه وتعابين وبتبقى فى حتت متطرفه من النجوع؟!!
فقالى:
علشان الخوف يدب فى قلبك وأنت داخل بيوتهم ,ولما البنى آدم يخاف ساعتها تركيزه بيتشتت وتقدر تلعب عليه وتقنعه يشوف حاجات مش موجوده أصلا ....
علمنى لغة السحر وأزاى أقرأ الطلاسم والعزائم ..علشان أبطلها , أتعلمت كل حاجه بسرعه اوى لدرجه أنه كان مبهور بيه , كنت أفهم الحاجه من مره واحد كأنى أتولدت علشان أكون ساحر , قالى المفروض يبقى ليا حيوان أو طائر أربيه أروضه علشان ساعات بنحتاج مساعدتهم .
وخيرنى مابين تعبان زى اللى فى كمه الطويل!!! أو غراب , فأخترت الغراب فلقيته تانى يوم جايبلى غراب صغير سميته " غداف"
علمنى أزاى أروضه وخلانى أقرأ عليه شوية عزائم تخليه مطيع علشان يطير ويجيلى تانى وعرفنى أن الغربان بتحب الحريه ومبتحبش تتحبس فى قفص وممكن يموت أو ينتحر لو أتحبس فى قفص !!
وفى يوم قالى أنه رايح مشوار مهم فى نجع جنبنا وأنه أحتمال يتأخر شويه
مقدرتش أروح معاه علشان كنت محموم وعندى دور برد جامد كان مكسرلى عضمى , فراح لوحده وسابنى فى البيت وياريته ماسابنى فى البيت لوحدى !!!!
لقيت نفسى زهقان ولو فضلت نايم على الكنبه هعيا أكتر ،
فقومت جبت كشاف نور , وروحت عند علبة الكهربا وفصلت الكهربا عن البيت كله , وروحت ناحية الأوضه ومديت أيدى ناحية المقبض الحديد ولمسته بطرف صوباعى فلقيته مابيكهربش فطلعت طفاشه وفتحت القفل
جيت أفتح باب الأوضه لقيته مقفول بالمفتاح بس على مين , العبد لله من شغلته فى كل حاجه مابقاش فيه حاجه بتعصى عليه ,بصنعه لطافه فتحت الباب بالطفاشه , ودخلت الأوضه فلقيت سلك الكهربا اللى متوصل فى مقبض الباب من جوه وقع
لفيت بالكشاف وبعينى على الكتب المرصوصه على الرفوف واللى على الأرض وقعدت أقرأ عناوينها لقيت
اللى مكتوب عليه " تسخير الجان لمنفعة الانسان" واللى مكتوب عليه " سحر الكهان فى حضور الجان " و " السحر العجيب فى جلب ألحبيب" " العهود السيلمانيه السبعه "وغيره
لحد مالفت نظرى كتاب شكله عتيق كده وغلافه من النحاس المعدن !!! ومالوش أسم زى بقية الكتب , فمسكته وقرفصت على رجلى وفتحته وعديت بالكشاف على أول صفحه كان مكتوب فيها تعزيمة التلازم !!!
مفهمتش يعنى أيه !!
فقريت اول سطرين كانوا عباره عن تعزيمه مكتوبه بلغة السحر قريتها بصوتى المبحوح من الحمى
مكلمتش السطرين ولقيت رياح شديده هبت على البيت والشبابيك فضلت ترزع جامد لدرجة انى حسيت البيت هيتقلع !!! قفلت الكتاب بسرعه ورجعت قفلت باب الأوضه تانى من غير ماأرجع السلك على المقبض , وقفلت القفل ورجعت باب الأوضه مقفول تانى بالطفاشه .. ورجعت على الكنبه بتاعتى
٤ أيام عدوا بعد الحادثه دى ودياب لسه مارجعش البيت !!! كنت مابنزلش النجع فى الفتره دى , علشان لسه جسمى كان بيفوق من الحمى , فوقت شويه من الحمى ونزلت البلد علشان أتصدم من اللى شوفته بيحصل فى النجع واللى سمعته !!!!
البلد كلها تعبانه وعندها حمى زى اللى كانت عندى بالظبط!! وتحولت لفره موتت ناس كتيره فى يومين بس !!!
وعرفت أنهم من يومين راحوا جابوا ساحر من النجع اللى جمبنا واللى فتح المندل على عيل صغير فى الساحه الكبيره !! و أكد أن دى لعنه أتسلطتت على النجع !!! واللى عمل اللعنه دى بيت جوه النجع !!! طبعا كل الناس فكرت فى بيت واحد بس بيت رقم 8 بيت دياب الساحر !!! وقبضوا على دياب الساحر وهو راجع من النجع اللى جمبينا وسجنوه والنهارده هيعدموه على المنصه قدام الناس كلها علشان اللعنه تزول !!!
جريت على بيت الدكتور عمر علشان أقوله على اللى حصل وعلشان ننقذ عم دياب بس لأسف طلع بقاله أسبوع بره النجع
جريت مع الناس اللى بتجرى ناحية المنصه اللى هيعدموا فيها دياب , فلقيت الدنيا متكدسه قدام المنصه , الناس كلها بتكح وبتأن من كتر التعب والمرض وفيه اللى بيوقع من طوله!!!!
فوق المنصه حوالى خمسة بيحجزوا علشان محدش يطلع على المنصه من فوق,
و واحد جته , تخين وطويل ماسك فى أيده سيف كبير و بيسنه على حجر صوان !!!
وواقف دياب أيديه متكتفه من ورا وساكت ومش مدى أى رد فعل ومبيحاولش حتى يدافع عن نفسه !!!
وفوق الكراسى اللى على المنصه قاعد مجموعه من أشراف النجع فى وسطهم الحاج" فكرى العياطى "واللى كان باين عليه التعب هوه كمان , مسك الميكرفون
وقال بصوت مجهد :
ياجماعه آخر مره هفكركم ده دياب اللى شفى بأمر ربنا ناس كتيره واللى فتح مندله وجاب عيالكم التايه وكشف عن قتالين قتله وسطينا , أرجوكم سامحوه دى غلطه واحده ...
.
قلت بصوت عالى :
يسلم فمك يا حاج فكرى
بس صوتى موصلش لأن كل الناس كانت بتقول.....
أقتلوه .. أقتلوه .. موت عيالنا .. موت أخواتنا .... موت أهاليا وهنموت كلنا لومامتش ... أقتلوا الساحر ... أقتلوا الساحر ..
فرجع الحاج فكرى قعد مكانه وأنصاع لكلامهم خوفا من غضبهم عليه هو كمان !!
مسك الميكروفون الساحر اللى كانوا جايبنه وقال :
ياأهل النجع اللعنه مش هتتحل الا أذا أتحرق الساحر أو أتقطعت رقبته زى التعبان !!
سكت شويه
وقال وهوه بيبص على الحاج فكرى :
وعلشان الكلمتين اللى قالهم الحاج فكرى فى حق دياب فأحنا هنرحمه فى موته ,هنقطع رقبته , علشان الحرق عذاب
وشاور لأتنين على المنصه فجابوا جزع خشب زى اللى الجزارين بيقطعوا عليه اللحمه وجابوا دياب اللى مكتف وحطه راسه على الجزع وجه السياف ورفع السيف لفوق علشان ينزل على رقبة دياب ... وقبل ماينزل على رقبته
سمعوا صرختى وأنا بقول بصوت عالى :
لا..... دياب معملش حاجه ... أنا اللى لعنت النجع ولو عايزين اللعنه تحل من عليكم لازم تقتلوا الساحر الحقيقى ... أنا
يتبع .....
لو عجبك الفصل سيب كومنت علشان ننشر الفصول اللى جايه
#رواية_ناير
الرواية لا تمت للواقع بصلة وأى تشابه فى الاسماء أو الأماكن فهو غير مقصود
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.