أنا وطيفه
وأول فرحة هتساعنا
ولمة عيد
وآخر ليل بيجمعنا
جميل ف البدلة والله
عريس لايق لعمر جديد
في ليل ساهي
وهيفارق عيون تعبت من التسهيد
تفسرها ملامح صورة ع الحيطة بتجمعنا كتاف شالت
وف البرواز
أنا وهو مفيش تالت
حكاوى العمر سرحت بيا ع البدايات
عبر وآيات
نصيب مقسوم
رغيف مهموم .. قسمته معاه
فتافيته غناوى ملاك
يلملم جرحنا وياه
ويوهبنا مواسم طرح
روح عاشقاه
مفيش مرة لعنت قصاده ذل الفقر
بلعت العوزة والحوجة وضل القهر
باشوفه الضل
وقلب الفل
بتتعطر حيطان البيت
منين مايهل
وبتزغرط ستايرها
ترق ودانى واحايلها
بلهفة أب يندهلى
يادرة باقية من أهلى
وصلت وجيت
اقــولك ايـــه ؟
ورب الكعبة يامحمد
أنا أتجنيـــت
مانيــش عــارفة
حدود قلــبى براحها لفيــن
أنـــا ضــــدين
جمعــت الـذنب والتوبــة
ورافعة الراية بالتحكيم
ف عاركــة حب منصوبة
على دكــة صوان فرحة
أنا ســارحــة
فى ليلــة وحدة بكرية
صحيح هتفوت وهتعدى
وانـــام ازاى بحرية
انام ازاي ؟
وميــن يقاسمــنى بـق الشــاى
وميــن يــاخد .. وميــن يــدى
ومين بالنظــرة هيشقر
ياليل أخضر
ومين يسمع صدى وردى
ولو هقفش فى كعب النوم
كوابيسى هتتخفى
وتلعب لما أفـز وأقـوم
وتتفســح فى وجــدانى
مـانـا اتعــودت صحيــانى
على ضحكة نهار وشك
وضرب مخـدة
ومنــاهــدة
وبلــة ريــق عتيق ناشــف
وشق ستارة .. نــور كاشـف
لسـان كــربــاج وبيناغشــك
علــى نكــشك
لفـرش الأوضــة والمـلايات
وسيل حكـايـات عــن الأحــلام
ودعوة رحمــة للوالــدة
أنـا شــاردة
وباتحير .. يامين يفرش لى سجادتى
يصلــى امــام
أنـا مش شايفة أيـامى
ربيــع قــدام
أنــا تحفة
عن الفرجة ماتعلاشي
بتعرض قســوة الأيام
على فــرحة بلــون شــاشـى
خــلاص مــاشى ؟
تصــدق انــى مــاحلمــتش
أطــل ف شــرفة الحــواديت
واشــوف شــاطر
يقاسمــنى بــراح البيـــت
رفضت أحلم بدون ضلك
باطبق لهفتي ف حضنك
واقول روحي افوتها لمين
ياطرح حنين
ونفحة نور من الوالدين
وصـــبرى عمــره مـا اتمـــرر
برغــم ســؤال بيتكــــــرر
مافيش فــارس يكمــل قعـــدة الكوشـــة ؟
وخطـــوة عتبـــة مفــروشة ؟
ودق صــاجــات ؟
ســـؤال .. بيعــدى زي خيـــال
اقــول هيهــــات
ســـند قلبي
وكوشــة دنيــتى ومـــددى
مــن الفرع اللى متوضي بحبل
متيـــن
مفكــرتــش بأن العمــر هيعــدى
وامـــوت نوبتيـــــن
أنــا تلميـــذة مجتهـــدة
مـــن الناجحيـــن
وفـــى التقديـــم
يبـــان اسمـــى مــع الســاقطين
يــاجــرح العيـــــن
يامتسطـــر علــى جبيــنى
بــلاش طرحــك يغفلــــنى
ويســـرق فــرحتى مـــــنى
ويعميــــنى
دى أول فــرحــة بتحــود علــى الناحيـــة
أنــا هفضـــل هنــــا صاحيـــة
أنـــــا مـــــش ضـــــد
ويكفيــــنى
أشـــوف الدنيــــا فى عيـــونه
جـــدايـــل ورد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.