(قصيدتي الاراجوز)
ولقيتني علي المسرح
قايم بدور اراجوز
من الصبح بتنطط
وكأني فرقع....... لوز
معرفشي في المنطق
ولا حتي قولت يجوز
معرفشي حتي انطق
اصل اللسان محجوز
ولا كنت حتي اسمع
واعمي بعنيا الجوز
بيغيرو في دوري
لما الكبير بيعوز
خلوني مرة اضحك
والتانية ضارب بوز
رغم اني شعري اسود
بيطلعوني عجوز
ببكي واضحكهم
و اطلع بدور فيروز
واشرب كمان منكر
وامشي وانا مهزوز
وبجسمي بطوح
و امسك بايدي الكوز
وارقص علي بابهم
يمكن الاقي الموز
يرموني في حروبهم
بالموت لوحدي افوز
و يعلو في مقامهم
وفي داهية 100 اراجوز
********************
وشايفني في الفنجان
بين البشر بتهان
رغم ان قلبي ابيض
اراجوز في دور انسان
من نفسي متخبي
ودموعي فوق خدي
واسكت لاني جبان
عايش في دور قهري
والاكل علي ضهري
وازاي اكون شبعان
بيقولوا شكلي جميل
رغم ان قلبي عليل
والهم هد الحيل
مسجون وانا السجان
عايش في سجن كبير
مرمي في قلب البير
مغلوب وانا الغلطان
خايف من الاحلام
راضي اكون خدام
بضحك علي نفسي
يومي شبه امسي
ويطلعوني جبان
عايش في قلب تابوت
وكلامي كله سكوت
مخنوق ونفسي اصرخ
او يعلي مني الصوت
واقطع لجام فرسي
واسرح مع الملكوت
واتحدي اي ظروف
واضرب بسيفي الخوف
يمكن ساعتها يموت
ويقولو دنيا حظوظ
مات اللي كان اراجوز
**********************
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.