الشاعر رضا ابو شنب
قصيدتي
(الفطرة)
اول ما جيت دنيتي
انا كنت علي الفطرة
بسند علي ركبتي
واحسبها بالخطوة
وأحسب كمان سكتي
لتسبني في السكة
واجري ورا قطتي
واحدفها بالشنطه
وبتجري وبتختفي
وارسملها خطة
وارسملها في خطتي
قطه تجيب قطه
وتغرها خطوتي
وبتنجح الخطة
وبعيني اشوف السما
مقسومة ١٠٠ حته
فيها النجوم والقمر
بينوروا العتمه
واليوم يجيب السنة
والعمر بقي سته
وقعدت في المدرسه
نايم علي الدكه
جابولي كل الكتب
ومدرسين سكة
كل اللي بيهمهم
يملوا الشوال فكة
ويكبروا في كرشهم
ويخلصوا الفتة
والبيضة ترقص لهم
و بيدبحوا البطة
وبيدنوا في سرهم
زي اللي راح مالطا
ويعلموك مكرهم
ويذودوا الشطه
اخر العلوم عندهم
إن النبي في مكة
ومين صلاح الدين
اللي فتح عكا
وان اللي يسمع لهم
هتجيله ١٠٠ جلطه
ولو تعيش زيهم
تبقي الحياة غلطة
الحرة تركع لهم
والسر في الخلطة
و مسكت انا في قهوتي
وقعدت في المطرة
بحلم اعيش دنيتي
او اموت عل الفطرة
بحلم اعيش دنيتي
او اموت عل الفطرة
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.