السِلفي الناقص ف المشهد
ممنوع م العرض ف السيما
المشهد كان تفاصيل
ركوب الخيل ف فلم قديم
و غنوة حزينه بتحكينا
المشهد كان ناقص رقصه
حضن وبصه
لعيون خاينين
أوهمنى الظن السئ ف التفكير
إن اللحظات اللي ما بينا
هتكون و يجوز حكايات كانت
لكن هانت ، جدا هانت
نكران معروف ، فركشه لظروف
موتت الحب اللي باقيلنا
الالم الحصري اللي مليني
كوشه و مأذون فستان ابيض
انحذفم خالص م القصه
إنساب الدمع اللارادي من سبب الحب اللاجابي
الشلل النصفي للعلاقات
الهوس الچيني اللي مالينا ! ف الشكليات
من خلف حدائق ضرب النار
من قلب الشوك طرح الصبار
المشهد
كان ناقص كل الاجابات اللي ف بالي
ف شرح بسيط جدا
ف الوضع الغريب طبعاً
بالوصف الدقيق جدا
استاهل كل اللي جرالي
هعتبرك كنتي و كان اسمك
وباء متعلق بلساني
هعتبرك جرثومه و بقايا جروح
نتجت م الحب العلماني
انا من دلوقتي نضيف خالص
و اعتبري أن حسابك خالص
هعتبرك كنتي و ما تجوزليش
هعتبرك ريش و غرام بقشيش
منعكس القصه الوهميه
هعتبرك جزمه متنفعنيش
و مقاس تفاصيلك مش قدى
انا بس اللي واجعني في قلبي
إن انا حبيتك من قلبي حب تحدي
المشهد كان ناقص مشهد
انا شبهي كتير ف وسطيكم
و المعني الجيد ف التعبير اوجعكم اهي باينه عليكم
الواقع كان ظلم علينا
ملعونه يا ذكري خذلتينا
نصابه يا دنيا سرقتينا
مريضه يا نيه خدعتينا
القسمه نصيب كان بينا
اكذوبة وهم عاش فينا
والسلفي تملي يبان كامل بوشوش غيركم
كتر خيركم
استحملتم شبهي بالظبط
كلنا موتي مع فرق الوقت
#أحمد_زيدان_البلياتشو
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.