على نفسك
كلمات مرفت جابر
............
ما بتعرفش تحب ازاي
إنما تعرف دايما تجرح
تفتح قلب القلب بمشرط
واما تشوف الدم بتفرح
شوفت خيانتك مرّه وأكتر
شوفت عينيك ساعة ما بتسرح
مش رح اكون ف رواية قلبك
خلف ستاره بتقفل تفتح
ولا رح اكون كومبارس ف مسرح
تنطق جُمله ورا الكواليس
ليلك مش ح املاه فوانيس
ولا ح اقبل بالدور التاني
مش ح اقعد ف الضل أعاني
واتسلّى بمسح الدمعات
أنا بطله ف كل الروايات
وبنات العالم سنّيده
على حظّك أنا واحده عنيده
وح ارد الطعنه بطعنات
كدبك مش حيفوت بالساهل
غدرك مش ح يسيب علامات
رح اداوي الجرح بأوجاعك
وح اسيبك ويّا الحيّات
تتبعتر على كل طريق
تفضل طول الليل عطشان
وتبل على السم الريق
رح اسيبك والميّه ف إيدي
تتمرجح بين نار وحريق
جرحك اللي ف قلب برئ
بكره يطيب
قلبي أكيد رح يلقى ف بُعدك
اللي يكون للقلب طبيب
وانت ح تشرب م الألاعيب
اللي اللي يبعتر فيك ويلمك
من كتر الأوجاع ح تلاقي
قلبك ملّك
ويخاصمك أسفلت الشارع
ويخاصمك ف الشارع ضلّك
مش ح تلاقي صحاب ف طريقك
م انت ما سيبتش شئ يشفعلك
كدبك هوّ اللي ح يفضلّك
علشان تفضل طول أيامك
عايش ..
وبتكدب على نفسك
..........................................
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.