غيرى كل الحقايق
عيدى ترتيب المشاهد
بدلى الأدوار براحتك
مافيش عالقصه ولا شاهد
عشان كت قصه ملعونه
وكدبه كبيره موزونه
يا اكبر وهم صدقته
وميت سكينه مسنونه
حرفى سيناريو الروايا
طلعينى شيطان رجيم
وانتى البريئه الطيبه
ووقعتى ف ادين اللئيم
اخطفى السوكسيه بقوه
وبانى لاحول ولا قوه
حقيقى كيدهن عظيم
طلعينى عنيف وقاسى
اعملى للقصه قيمه
كترى الشر ف مشاهدى
ما انتى طول عمرك كريمه
وامحى ليا اى موقف
فيه ابان فعلا برئ
شوهى سيرتى وصورتى
ما تسيبيش ولا اى شئ
هاتى عبر الدنيا فيا
ذودى البهرات شويا
الفى وضيفى وابتكرى
طلعى نفسك ضحيه
ويا ريت تهتمى بالتفاصيل
عشان تتصدقى اكتر
ومايبنش ان ده تمثيل
وكل الخلق تتأثر
خلى البرائه تبان عليكى
ومن عنيكى يحسوا طيبتك
شدى حيلك ياله واتجدعنى
ورينى موهبتك
خلينى ابص لنفسى واتباهى
واقول انا صح
ومش غلطان عشان سيبتك
اه صحيح...
ابقى قولى ماكنش طيب
وانه عمره مكان قريب
وانه مش قد الوعود
وانه ياما وعدنى انه
مش هيحرم قلبى منه
وفجأه يبقى مالوش وجود
قولى كان انسان انانى
وانه حطمنى ورمانى
حب ده ولا انتقام
قولى عنى كل حاجه
واوعى تنسى اهم حاجه
دمعى وسط الكلام
برضه دى تفاصيل مهمه
وليها تأثيرها الإجابى
عيطى بحرقه وقوليلهم
عمرى ضاع جمبه وشبابى
واختمى المشهد بدعوه
منه لله البعيد ربنا يقصر فى عمره
داس عليا وباعنى ياما
خلى اخر جمله ليكى مؤثره
وتسيب علامه
وماتخافيش.حتى لو افورتى حبه
كله فى ثياق الدراما
احمد الزهيرى
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.