اتعلمت أفك الخط وابطل عط ونط كتير
اتعلمت أحب بجد واحب الجد واعيش بضمير
اتعلمت أبص بعيني لأبعد حد
وفوق في السما بجناحي أطير
كنا بنمشي زمان تاتا تاتا
ناكل درة مع زر بطاطا
ضحك وحب ومرة غتاتة
بس حياتنا ماليها الخير
كنا زمان عايشين ايامنا
شايفين بكره جميل قدامنا
نرسم ببراءة ف أحلامنا
من غير ازمة ولا تفكير
عشنا بنحلم من غير خوف
ماتعبناش من اي ظروف
ولا كان فيه غير المعروف
كنا جُمَال زي العصافير
كانت اللمة ع الطبلية
لقمة ف لمة لذيذة هنية
جبنة وعيش وكمان طعمية
عسل ابيض وخيار وفطير
ليه دلوقتي الحال اتغير
كل امور الدنيا تحير
مابقاش فيها كبير وصغير
فكر صايبنا وهم كبير
اتعلمت أعيش على قدي
فوق الصعب أفوت وأعدي
رحلة عمري واخدها تحدي
للأوهام مافضلشي أسير
اتعلمت أحب بقلبي
وانسى ف حلمي همومي وغلبي
سايبك تمشي معايا ف دربي
وانا من غلبي هاشب واطير
دايما درسك صعب وقاسي
حتى الفرحة ماجتش مقاسي
شايلة قلوبنا تعب ومقاسي
نار في شهيق ومرار في زفير
اتعلمت أفك الخط وابطل عط ونط كتير
اتعلمت ولسه انا ياما
هاتعلمني الدنيا علامة
واغرق لازم في الدوامة
وابعد عن شغل الفرافير
موقف صعب وموقف اصعب
مره هاتصبر مرة هاتتعب
مرة الدنيا بعقلك تلعب
تنزل فيك هبد وتكسير
مرة تجيبك مرة تسيبك
والمكتوب لك جاي يصيبك
هاتعيش مقسومك ونصيبك
وانت بتحلم بالتغيير
حب الدنيا وعيش وياها
واتحمل غلبها وقساها
مش ممكن تقدر تنساها
لا صغير ولا حتى كبير
اتعلمت وشفت يا دنيا
امتى يضيع الحلم ف ثانية
تجري وراك الفرصة التانية
وتروح من ايدك للغير
طز يا دنيا خلاص بلا قافية
سايبك كده بالهنا والعافية
ماتت ضحكة جميلة وصافية
وكفاية علينا الطوابير
هافضل ادعي عليكي ف سري
وانسى عذابي معاكي ومري
لو هاتعدي بشوق وتمري
يبقا هاغير خط السير
انتي يا دنيا يا حلوة وقاسية
سايبة الجرح معانا وناسية
زارعة الشوك في طريقنا وماشية
من غير شرح ولا تفسير
شايل ياما جراب الحاوي
وهاسيبك وابعد وانا ناوي
افضل اكتبلك في غناوي
واغزلك من حلمي حرير
اتعلمت أفك الخط وابطل عط ونط كتير
اتعلمت أحب بجد واحب الجد واعيش بضمير
اتعلمت أبص بعيني لأبعد حد
وفوق في السما بجناحي أطير
تحياتي محمد ياسين
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.