مربعات النقاش
============ عونى هشام
نقاش وبنقش حروفى بالدهب والماس
وبالفرشة اداوى الحب بالاحساس
عارف حدودى راسم خطى
وما اخطى حدود الناس
--------------
نقاش وبنقش لكل توب نقشه
ازود كلامى الحلو وابعد الوحشه
الدنيا دى مدرسه للعلم والحكمه
وزارع الخير يكنس الشر بمقشه
--------------
نقاش وراسم شجرة جوه البيت
فيها الثمر الوان وبرضه ما كفيت
لسانى فيه الوفا وقلبى فيه الدفا
كملت رسمى ولسه ماوفيت
--------------
نقاش وبرسم وردة كل صباح
فيها الامل وتداوى كل جراح
تمسح بكى وتدارى دمع العين
والعين بصيرة واللسان مداح
----------------'
نقاش وراسم وشى بلياتشو
ارسم الضحكه وقلبى حزين
اصبر على جوعى واحبابى يتعشوا
افرح معاهم واخبى دمع العين
-----------
نقاش وراسم صورة للدنيا
تاهت معالمها وفكرى احتار
ياريت زمانى رجع ولو ثانيه
ابدل حمولى واغير المشوار
-----------
نقاش وفى البرواز حته مكسوره
وانا بخبرتى قلت اعدلها
تاهت الالوان وضاعت الصورة
وانا نفسى مكسورة مين يعدلها
-----------
نقاش وراسم فل مع ازهار
طلع النهار نوره يساع الكل
حدد مسارك وابتدى المشوار
ومن الصحاب نقى منهم خل
----------
نقاش وراسم ع القلوب مفتاح
وعزفت بالفرشه لحن بدوى اصيل
كتب القلم ترياق يداوى جراح
وانا اللى جرحى زاد وهد الحيل
---------
حطيت غرامك فوق ميزان الشوق
ونقشت جنبه غرامى فى الكفه
لقيت غرامك هُب طالع فوق
وميزانه ...... خف ........ ما وفى
----------
نقاش بنفسى ونفسى حلمى يتحقق
ارسم حروف الكلمه وادقق
فى كل خطوة تعدل المايل
الحمل مال منى وحلمى اتشقق
-----------
-----------
عجبى على نقاش ماشى وساب فنه
والحرف منه كان فرح وسرور
غلبه الالم واتمكنت منه
وساوس الشيطان تاه فى ارض البور
-------
حطيت غرامك فوق ميزان الشوق
ونقشت جنبه غرامى فى الكفه
لقيت غرامك هُب طالع فوق
وميزانه خف ما وفى
----------
عشق النقاشه فن
مش شخبطة الوان
لو ...... الحروف .... بالطن
تكفينى ..... لحظة ....... حنان
===========
#عونى_هشام
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.