أصل القصيده و القوافي
ف حالة تعافي
طعم الحياه ملفوف حروف
رميت سلامي ع الورق
قلت العوافي
علي كل لون ياعمر خايف
هزة زلازيل البحور
ف الموج الغشيم
جوا سوق الاشتياق
و الحب العقيم
خوف الصبيه علي طفلها
لحظة ما كان علي كتفها
يخطف حياة من دمها
و ربك رحيم
من داخل البطن اللي شالت
جنين امل
و الطلق خوف مفروش
علي أرضها
لحظة ولاده متعثرة
ساعة ماضمت جرحها
وربك حليم
حرب الشوارع
و الزقايق و اللوم محبه
لاجل النبي
محتاج رصيف فيه استخبى
و العشا ف بطن الجياع
بركان يثور علي أرضها
شيلوا الفواصل
شوفوا اللي حاصل
اصل الحكايه كلها
ايه اللي باقي ع الورق
عفن العرق
الهدمتين و الكام لحاف دابوا
شايفك مرايه مكسره
ملامحي فين غابوا
علي مركبك غرقان
عطشان ما تبلي ريقي
مش لاقي غير الصمت متخبي في وريدي
انا توهت ف المولد
انا الحلم ال خاف يُولد
انا المسافات ال مطويه
انا الفرحة ال منسيه
انا الفلاح ، و انا الملاح
انا الضابط و انا الجندي
ف ايدي سلاح
انا طبيب دكتور بداوي جراح
انا القبطان ف ال بحار سواح
انا العامل ، انا التاجر
انا العايش انا الصابر
أنا المطحون مسا و صباح
دعياني ف الاحزان و نسياني ف الزفه
ف ساحة الاراجوز وخداني متيت لفه
كامل ميزان المرمطه و حطاني ف الكفه
ف المُر و الاوجاع رسمالي خط السير
اسمي مع الاحرار مع اني فيكي اسير
#أحمد_زيدان_البلياتشو
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.