كلمات مرفت جابر
دقّة حُب
.........
روح شمالك أو يمينك
يعني شرّق واللا غرّب
مستحيل عن عيني تهرب
مستحيل من قلبي تمشي
مهما تبعد برضه أقرب
للعيون من حتى رمشي
مستحيل الوقت يمشي
ثانيه واحده بدون وجودك
دانت سقّا ومين يا سقّا
غير إيديك تحضن ورودك
واللا مين ف الحب يقدر
لحظه يتجاوز حدودك
دانت وسط الدنيا جنّه
والبخور من عطر عودك
والحياه ما تكون بدونك
عايشه بارقي الحب بيك
قلبي .. حبي .. عمري كلّه
مش خساره يا روحي فيك
لو ح اموت وتعدّي جنبي
ح اصحا من نظرة عينيك
واللا من لمسّة إيديك
أو يجوز وحياة عيونك
من خيال ضِلّك عليّا
قلبي دق بلحن حبّك
غصب مش حاجه بإيديّا
عندي أكتر من دا ياما
عايزه اقوله ومستحيّه
هوّ يعني هواك شويّة ؟
دانت جوّه القلب كون
والوطن بيكون ف كفّك
قلبي ممكن غصب عنّي
يجري منّي وييجي صفّك
صعب أتمكّن ف وصفك
وانت جنّه ما تتوضفش
واللي ما تشوفك عيونه
مهما شاف ح يكون ما شافش
كل شئ ف الدنيا غش
إلا دقّة حب صادقه
ليها باب القلب يفتح
بعدها بالنبض يحلف
إن بابه ما يتقفلش
....................................
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.