رسالة زوجة
ياخاين عشرتى وياك
وحقى مضيعه كزوجة
تهينى ازاى قصاد أهلك
وتعمل منى إضحوكة
كرامتى معاك مضيعها
قصاد الكل كالعادة
كإنك شخص عنى غريب
وانا مش زوجة ولا حاجة
بدل ما اتحامى فيك بسكت
وبتغاضى عن المفروض
وادافع ليا عن نفسى
كإنك مُت مش موجود
كتير انا كنت واقفة معاك
وبتحمل معاك المُر
وأول ربنا ما إداك
نسيت ان احنا عِشرة عُمر
مفيش ولا مرة تشكرنى
وتُجبر خاطرى لو بكلام
ودايما رأيك انت الصح
وانا اللى اخرس لإنى مدام
بتيجى عليا وتلومنى
وتعمل قُبة م الحبة
وهاين عمرى ده وسِنى
كإن انا طفلة بتربى
أنا اللى استاهل انى رضيت
أعيش متهانة بيك عمداً
ولو ترجع حياتى وجيت
ماكنتش هرضى بيك أبداً
كرهتك
قد ماعاشرتك
وكرهى ف كل يوم يزداد
وغصبِ عنى بتحمل
عشان بينك وبينى ولاد
ماتستناش اكون زوجة
ولو زوجة هكون ف الشكل
وطلباتك يادوب عندى
أوامر ربنا والأكل
كفاية القلب مات منك
ومش باقى الا حبة عقل
بعيش بيهم عشان يمكن
يكون مكتوبلى خير قدام
خلاص سلمت للأيام
ومش محتاجة تسمعنى
لإنك مهما اقول ف كلام
ماعندكش الا إيه يعنى
ياريت كنت ابقى زى ماكنت
عارف لو ينفع ارجع بنت
هبوس رجلك ترجعنى
لكن صعب اللى راح يرجع
ف مضطرة لحياتى معاك
هكون جنبك ومش وياك
مجرد زوجة مش أكتر
كفاية عليا وانا جنبك
مريضة بضغط وبسكر
هسيبك للضمير يمكن
يحاسبك ع اللى عدى وفات
وهشكى لربنا و هاخد
بدل عمرى اللى ضاع حسنات
صحيح كان لازم اتكلم
وافضفض باللى جوايا
ولو كان حتى مع نفسى
ومين غير نفسى دى معايا
رسالة زوجة موجوعة
ومش لاقية اللى يسمعها
كلام كان نفسها تقوله
لكن أخلاقها تمنعها
#الشاعر_احمد_ذكي_خليل
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.