إكمنُّه خام
كلمات مرفت جابر
ديوان اكمنه خام
...........
رغم قلبي بطبعه عاقل
والجنون من عام لعام
رغم طبعه تمللي هادي
يعني مش غاوي الغرام
فجأه حس كأنه تايه
والا ضايع ف الزحام
شافك البحر الحنيّن
سابني راح ف البحر عام
حس موجك كف راحه
خف من دقّه الألام
فجأه هاج الموج وخلّى
قلبي يتحوّل حطام
هوّ طبع الحب قاتل ؟
واللا ع الحب السلام ؟
واللا قلبي اكمنّه خام
يبقى من حقك تهدّه
تسحبه بشويش ف إيدك
وبجحود قلبك تردّه
يلقى نفسه خيال ممدد
قبل حتى ما تيجي عنده
يبقى ورد بشوك تمدّه
لجل ينزفلك عبير
سيبته طير مربوط ف قفصك
مستحيل يقدر يطير
قالوا إن الحب جنّه
شوفت من حبك سعير
أصل قلبك لو بصير
عمره ما يفرّط ف قلبي
إللي شافك فجأه راحلك
والمكان بقى فاضي جنبي
ذنبه ما بيعرف يخبّي
رغم إنّي ..
لومته ياما ما كانش يسمع
منّي لوم أو كان عتاب
طار معاك عدّى السحاب
والنتيجه لقيته واقع
زي نقطة مطره نزلت
من سماها لوش أرض
سبته يبقى ف حضن برد
لو ما ماتش من ارتطامه
يبقى ح يموت م الزكام
هوّ طبع الحب قاتل ؟
واللا ..
ع الحب السلام ؟
...................................
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.