رساله مواطن مصري
فيكي حاجه محيراني
مره تبقي مزعلاني
مره تبقي مفرحاني
مره احس بأن ليلك ليل طويل
كل خطوه مشيتها عدت الف ميل
ومره احس بضحكتك كل السعادة
وابقي فرحالك زياده
وابقي شايف في بتسمتك
نسمه للقلب العليل
ولسه فيكي شئ جميل
عارفه يا مصر انا امتي
بحس بأنك غاليه عليه بجد
لما بكون تايهة في الغربه
واسمك ييجي علي لسان حد
ساعتها بحس ان انا مخنوق
وابقا مشتاق لحضنك شد
انا عارف انك تتحبي
وان الكلام من وراء قلبي
لاكن عشان زعلتيني
كان لازم انك تتعتبي
يا ام الهرم والنيل
كفاياكي بقي تمثيل
في ايه عماله تجري مالك
محملانا جميل
وانتي كده ممرمطه عيالك
انتي الي كنتي في يوم
زينة البلاد
ابنك يقوم من النوم
ولا يلقيش الذات
موتي فينا الامل
طفشتي كل ولادك
ماعدشي فيكي حنان
وانا برضوا اكون انسان
من حقي احلم واعيش
من حقي اتكلم واقول
حتي لوماهتسمعنيش
برضوا هتكلم واقول
انا الي لحم كتافي من خيرك
بس نص اللحم فول
ما هو مش معقول
ابنك انتي يبقي
مش لاقي الرغيف
يبقي تايهة وسط ارضك
ولا نايم ع الرصيف
مش دي ارضك الي
يا ما زرعتها
مش دي حروبك دي
الي ياما حربتها
خلتيني بقيت بكلم روحي واقولها
متزعليش علي حاجه كنت بحبها
وغـــصب عني بكيــــت ولقيت
دموعي نازله من عيني لوحدها
معرشي ببكي الي كان بينك وبيني
ولاببكي عشان مفيش حد يوسيني
ولا ببكي عشان انتي امي
ومستحيل الام تقسي علي أبنها
انا مش بعايرك
انا بس عاوز افكرك
بجزء واخده من جمايـلك
يوم ما كنتي في محنتك
انا كنــــــت شــــــــــايــــــلك
يوم كفـاحك
كان سلاحك فوق كتافي
كنت بجري في وسط الصحراء حافي
كنت بوهـبلك حياتي
عشان مشوفــــــكيش
يـــــوم تخـــــــــــافي
ما هو كل ابن لازم ييجي في يوم
لامه يطلب رضاهـــــــا
واي ام اي ام مهما كانت
مستحـــيل تقتل ضناها
دالوقتي ايه يربطني بيكي
اذا كنت اصلا مش لاقيكي
الوظيفه ابنك ع فيض الكريم
الفلوس لو تفتشيني مطلعيش مليم
الكرامه ضاعت يا امي وبقيت مهانه
ولسه انا في حضنك يتيم
انا لا زعلان ولا طهقان
ولا عندي اي احتياج
مش عاوز منك علام
ولاتصرفيلي علاج
ان كل طموحي فيكي
اجيب ليومي القوت
بافحت في قلب الصخر
عشان ما جوعشي وأموت
ده انا من قسوتك
كتبت قصه حياتي مذكرات
مخضوع ويا اما هتفت باسمك
وسألي العمر الي فات
متجبيش سيره الحضارة
ومتقوليش الاهــــــرمــــات
كل دول ذكري في تاريخك
مش هعيش ع الذكريات
حتي لون الدم الي أختلط بيني وبينك
جوه منه النبض ماااااات
انا الي يامــــــا هتفت
ويامـــــا قولت غناوي
شايل في قلبي سؤال
ومن زماني نااااااااوي
استحلفك بميت يمين
انا أبنك انتي ولا ابن مين
وقبل ما تجاوبيني بيني وبينك
ربنا شاهد وسامع
ان كنتي خلفتيني ولا لقيتيني
جمب باب جامع
ردي عليا جاوبيني ريحيني
جوايا نار باتئيد
احلفيلي بان ابنك
مش لقيتيني جمب حيط
وان كنت ابنك
اثبتيلي
بان نفس تاريخ مـــيلادك
يــوم مـــيـلادي
عرفيني الحق وعلميني
ازاي عليه اصرخ ونادي
متشمتيش فيا الإعادي
خليني لما اسمع حروفك
ولا اشوفك اقووول بلادي
اقول بلادي لكي حبي وفؤادي.
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.