قصيدتي
(ياابن بطني)
وانت نايم جوه بطنى
كنت اخاف اجرى واخطى
حتى قبل ما يجي يومك
كنت حتى بخاف اوطى
*********
كنت بحلم لما تيجى
تبقى ابنى وتبقى سيدى
تبقى زى ابويا وامى
لو هتاخد من وريدى
***********
مرت الايام طويله
والشهور كانت تقيله
لما قالو خلاص هتيجى
كنت بحلم كل ليلة
************
القمر اهو جه وزارنا
لما جيت نورت دارنا
لما نسمع بس صوتك
كل ليلة تكون نهارنا
***************
تاتا تاتا و حبه حبه
كنت بزرعلك محبه
كنت دايما اشوف خيالك
لما كنت بتستخبى
**************
الصغير كان بيكبر
وانت ياابنى الله اكبر
زى بدر فى يوم تمامه
من جماله الناس تكبر
*****************
فى المدارس كنت شاطر
كنت عامل ليا خاطر
لما كنت بشوف دموعك
كنت بجرى واقول ياساتر
***************
شوفت صورتك قولت ابوك
والعرايس يطلبوك
كنت ابخر فيك واسمى
لما كانو بيحسدوك
************
اوعى للاندال تطاطى
او تصاحب حد واطى
اوعى تنسى ياابنى امك
لما تيجى تقول مراتى
***************
اوعى ياابنى فى يوم توطى
او لغير الله تخطى
عيش لغيرك وبضميرك
تبقى يومها ابن بطنى
تبقى يومها ابن بطني
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.