ياحضرة الارجوز فينك
نعم ياعمدة عايز ايه
قاعدين سنين مستنينك
وحيات ابوك لتسلينا
فرحنا حبة ف ليلالينا
هوه انت ليه مابتظهرشى
هوه انت فين و جرالك ايه
وحيات ابوك لتفكرنى
بضحكة منك فرفشنى
هوه انت فين كده هنجيلك
سلفنا نكته قوام قلى
ياعم والله احتاجنالك
مرت سنين كده واشتقنالك
الدنيا كرباج بيلسوع
ع الجته والله بيوجع
عايزين نشوفك ونبوسك
هوه انت ليه مابتظهرشى
٠٠٠٠٠٠٠٠٠٠٠٠٠ ٠٠٠٠٠٠٠.
انا الاراجوز المتأرجز
زعلان م الضحكة و متأجز
هوه انت كمان راخر زعلان
قاعد وف جحرك ارفان
خايف لا تطلع ف اللمه
وكرونا تاخدك ف الزفة
خدلك كمامة كده والبسها
حزم ف وسطك ماتخافشى
ربك كريم عالم بينا
تعالى واقعد وسطينا
افرح وفرحنا بكيفك
ياحضرة الاراجوز فينك
والله انا مش خايف منها
الناس غرقانه وف همومها
الهم مدوب شفايفها
والفرح اهو تاه من اعتابها
٠٠٠٠٠٠٠٠٠٠٠٠٠٠٠٠
انا كنت مشغول فى مصالحه
هدوا المكان اللى لاممنى
اراجوزتى زعلت ولامتنى
وبقينا على طرف الشارع
فى البرد وف مطرة نصارع
دنا شفت ياما كتير فقرا
بينقوا ف زبالة امبارح
وشباب جميل واقفه وسارحه
بيغنوا على حلم ورايح
اسكت ياعمده هقولك ايه
الضحكه خاصمت شفايفكم
علشان غرقتوا ف غرايزكم
ونسيتوا ياما كتير دينكم
وبقيتوا عباد اموالكم
ونسيتوا ان الجار للجار
ولا تعرفوش غير مصالكم
خد عندك الاسعار ف النار
بتلهلب الغلبان يحتار
وعايزنى أجى
تقول فينك
فين الموالد واللمه
والصحبة لما ف يوم تدفا
بالحب لما بيجمعهم
والنيه لما تكون صافيه
اخوات ولا حاجه تفرقهم
قلى ياعمده انا هظهر ليه
ماعدش لى مكان وسطيكم
الغل اصبح فى شعاركم
انا استويت من حكوايكم
الضحكة مابقيتش تفرح
صدق اللى قال كده واصفرت
الضحكة صبحت بتجرح
ووراها ف زنوبنا اهى جرت
ياما كان زمان الاخ لاخوه
عكازة لما طريقه يتوه
وسلام بالايد كان حنية
العيش والملح اغلى هدية
متفكرنيش تانى ياعمده
متحزنيش كده بمناهده
راح اقولك ايه تانى ياعمده
لو حبيتنى ارجع تانى
عدلوا من روحكم من تانى
والله لو شفتوا ف دينكم
وقريتوا دستور اديانكم
رح تبقوا ف الصف الاول
والفرحه هتسكن ف قلوبكم
كده هاارجع ليكم من تانى
والضحكة هترجع م الاول
والحب حيرجع من تانى
انا يومها رح اجرى واجيلكم
ونفرح بعضينا وتانى
وهنكت من تانى وهظر
والحب هيكبر وهيكبر
والفرح هيرجع من تانى
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.