على هامش السيرة
على هامش السيرة
انا ها أحكى عن غايبه
بصيغة الحاضر
رغم الفراق سايبه
نبض الحنين واصل
و ليها بصمه
فى صميم الروح
و سيرتها بلسم
شافى اى جروح
و خيالها دايما
كافى فين ما بروح
رغم الفراق
فضلت محصرانى
و بقيت بعيدها
كل يوم تانى
بقسمنى بينى و بينها
قسمة عدل
فا تاخدنى هى
و يبقى ليا لا شئ
و افتح طريق الحلم ع الفرحة
الاقيها ساكنه برضه كل طريق
بحكيها عمدا كل يوم للناس
و بشوفها اوضح لو يزيد البعد
لا البعد مرة يغير الاحساس
و لا قلبى مرة هان عليه الوعد
السيرة حاضرة
رغم طول السنين
و لازلت شايف
نفسى بين حضنها
و لازلت بربط
ضحكتى بفرحها
و لازلت بدفن
حزنى فى عنيها
و لازلت بربط كل شئ بيها
و لازلت عايش دنيتى ليها
و بدون وجودها
عمرى مالهوش سبب
و بشوفها فعلا معادلة
ليها العجب
انا اللى حاضر
تملى ببقى غياب
و هى اللى غايبه
بالحضور كله
اول غياب حاضر
و منتهى آتي
و بداية ما بتنتهيش
يكفينى بس
مرورها فى حياتى
و يكفى الحياة وجودها
لأجل الامانى تعيش
السيرة عطرة
رغم طول الفراق
و لازلت فاكر
و لازلت دايما
كل يوم بشتاق
و لازلت بعمل
نفس الحاجات وحدى
كما كنت وياها
و لازلت عايش
على حلمها الوردى
و لا عارف انساها
بمشى فى شوارع
لينا فيها حاجات
و العن ظروفنا
و العن المسافات
و العن بشر غيرنا
قفلوا الطريق الصح قدامنا
سرقوا الفرح مننا
و قتلوا احلامنا
و العن غبائى
يوم وداعنا الاخير
لكن عزائى الوحيد
لو تبقى دايما بخير
#
تسلم ايدك 😍🤩
ردحذفربي يسلمك ويحفظك أستاذنا نورتنا
ردحذف